Ադրբեջանական ԶԼՄ․ Ստեփանակերտը Ալիևների ընտանիքի նոր «լվացքատուն» է դարձել

PanARMENIAN.Net - Ստեփանակերտի հայաթափումից հետո քաղաքը վերածվել է Ադրբեջանի նախագահ Իլհամ Ալիևի ընտանիքի նոր կոռուպցիոն հարթակի, պնդում են ադրբեջանցի հետաքննող լրագրողները։

Ադրբեջանի կառավարությունն այստեղ իրականացնում է տարբեր բիզնես նախագծեր, որոնցում Meydan TV-ի թիմը տեսել է կոռուպցիոն դրսևորումներ և ոչ թափանցիկ ֆինանսական ծախսեր։

Ստեփանակերտում հյուրանոցների կառուցման քողի տակ Ադրբեջանի պետբյուջեից հսկայական գումարներ են ներդրվել, ընդ որում իշխանությունը չի թաքցնում՝ բիզնես նախագիծը վերահսկում է հենց նախագահական աշխատակազմը, հայտնում է «Ազատությունը»։

Վերածննդի հրապարակում գտնվող նախկին «Արցախբանկի» շենքը, 2000-ականներին կառուցված «Վալեքս գարդեն» շքեղ հյուրանոցը և Ազատամարտիկների պողոտայի «Եվրոպա» հյուրանոցը ներկայացվել են որպես նոր խոշոր ներդրումային ծրագիր՝ կարծես դրանք կառուցվել են զրոյից՝ մեծածավալ պետական ֆինանսավորմամբ։

Այս երկու հյուրանոցները վերափոխվել են թեթև արտաքին նորոգմամբ, իսկ «Արցախբանկ»-ը՝ ներքին վերաձևավորմամբ, ինչի արդյունքում դրանք դարձել են հինգ աստղանի բարձրարժեք հյուրանոցներ։ Նրանց գովազդը անձամբ Ալիևն է անում։

Բեռլինում գործող Meydan TV-ն պարզել է, որ պետական ռեգիստրում այս հյուրանոցային ցանցը գրանցված է որպես Ադրբեջանի նախագահի աշխատակազմին ենթարկվող կառույց։ Այնուամենայնիվ, թե որքան գումար է ծախսվել պետբյուջեից և որ ընկերություններն են ներգրավված եղել վերանորոգման աշխատանքներում, Ադրբեջանի իշխանությունները չեն բացահայտում՝ չնայած օրենսդրական պահանջներին։

Ադրբեջանի նախագահը անձամբ մասնակցել է այս հյուրանոցների բացման արարողություններին։ Հետաքննող լրագրողները նկատել են, որ Ալիևի վերջին այցերը Ստեփանակերտ տարօրինակ կերպով համընկել են հենց այս կառույցների բացման արարողությունների հետ։ Նույնիսկ նրա որդին՝ Հեյդար կրտսերը, որը հազվադեպ է երևում հանրային միջոցառումներին, այցելել է Ստեփանակերտ՝ անձամբ ծանոթանալու իր ընտանիքի անվան կապվող այս բիզնես ծրագրին։

Չնայած հյուրանոցները ներկայացվում են որպես զբոսաշրջային խոշոր կենտրոններ, ադրբեջանական պաշտոնական լրատվամիջոցները երբեք չեն հայտնել, թե արդյոք այնտեղ գիշերել է որևէ զբոսաշրջիկ։ Ըստ հետաքննող լրագրողների՝ վաղուց կառուցված այս շենքերը բացվում և փակվում են բացառապես Ալիևների այցերի ժամանակ, ինչը կասկածներ է առաջացնում պետական միջոցների արդյունավետ օգտագործման վերաբերյալ։

Ի տարբերություն Ադրբեջանի վերահսկողության տակ անցած Արցախի մյուս բնակավայրերի, Ստեփանակերտում բնակեցված ադրբեջանցիների թվի վերաբերյալ Բաքուն չի տրամադրում որևէ տվյալ։

Ամիսներ առաջ հայտարարվել էր, որ Ստեփանակերտում բացվել է ադրբեջանական համալսարան, որը, ըստ պաշտոնական աղբյուրների, ունի բազմահազար ուսանողներ։

Ադրբեջանը 2023–ի սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով երկիրը։ Արդյունքում մեկ օր անց՝ սեպտեմբերի 20-ին ԱՀ իշխանություններն ընդունել են ռուսական խաղաղապահ առաքելության հրամանատարության առաջարկը կրակի դադարեցման վերաբերյալ՝ համաձայնվելով Բաքվի պայմաններին՝ ՊԲ զինաթափում և Արցախի Հանրապետության լուծարում։ Սեպտեմբերի 24-ից արցախցիների բռնի տեղահանում է սկսվել, 100,000–ից ավելի մարդ է բռնի տեղահանվել Հայաստան: Ըստ որոշ տվյալների, Արցախում մոտ 20 հայ է մնացել։ Սեպտեմբերի 28–ին ԱՀ նախագահ Սամվել Շահրամանյանը հրամանագիր է ստորագրել ԱՀ լուծարման մասին, որը ուժի մեջ է մտել 2024–ի հունվարի 1–ից։