Հացադուլ ՄԱԿ–ի մոտ․ Եթե բոլոր նրանք, ում Վարդանյանն օգնել է, իրենց ձայնը բարձրացնեն, առավել լսելի կլինի

PanARMENIAN.Net - «Կամք» նախաձեռնության անդամ Լևոն Խաչատրյանը մարտի 3-ից անժամկետ հացադուլ է անում ՄԱԿ-ի երևանյան գրասենյակի դիմաց՝ ի պաշտպանություն Բաքվում պահվող հայ ռազմագերիների։

«Ռուբեն Վարդանյանը բարերար էր, եթե բոլոր նրանք, ում երբևէ օգնել է Վարդանյանը՝ իրենց ձայնը բարձրացնեն, ապա այն առավել լսելի կլինի։ Բայց այդ մարդկանց համախմբել է պետք»,-նշել է Խաչատրյանը։

Խաչատրյանը նշել է, որ պատրաստ է դադարեցնել հացադուլը միայն այն դեպքում, երբ Ադրբեջանում ապօրինի պահվող Արցախի նախկին պետնախարար Ռուբեն Վարդանյանը ևս դադարեցնի իր հացադուլը, հայտնում է «Փաստինֆոն»։

«Կարծում եմ՝ մեր ձայնն առավել լսելի կլինի, եթե Սփյուռքում միջազգային կառույցների կամ այլ երկրներում Ադրբեջանի դեսպանատների դիմաց նման ակցիաներ լինեն։ Կոչ եմ անում սփյուռքի մեր հայրենակիցներին միավորվել այս խնդրի շուրջ»,- ընդգծել է նա։

Նա հավելել է, որ նման ակցիաներ անհրաժեշտ է կազմակերպել նաև Հայաստանում՝ տարբեր երկրների դեսպանությունների մոտ։

Նշվում է, որ այս օրերին շտապ օգնության բժիշկները չեն այցելել նրան։

ՀՀ ԱԳՆ–ն հայտարարություն է տարածել՝ ընդգծել է, որ շարունակում է միջազգային գործընկերների ուշադրությունը հրավիրել Ադրբեջանում պահվող հայ ռազմագերիների, պատանդների և այլ կալանավորված անձանց ազատ արձակման խնդրի, ինչպես նաև դատավարական կոպտագույն խախտումներով և խոշտանգման աղաղակող նշաններով նրանց մի մասի նկատմամբ ընթացող բեմականացված դատավարությունների վրա:

Իրավապաշտպան Սիրանուշ Սահակյանը հայտարարել է, որ Արցախի նախկին պետնախարար Ռուբեն Վարդանյանի լուսանկարները վկայում են մարմնի տեսանելի հատվածներում առկա վնասվածքների մասին։ Արդեն մեկ շաբվաթ է Վարդանյանը հացադուլի մեջ է։ Վերջին դատական նիստում Վարդանյանի ինքնազգացողությունը կտրուկ վատացել էր, իսկ դատական նիստի ընթացքում արված լուսանկարներում տեսանելի էին նրա դեմքին առկա վնասվածքները։ Չնայած դրան՝ դատարանը ստիպել է նրան մասնակցել նիստին։ Վարդանյանի միջազգային փաստաբանը նախօրեին մանրամասներ էր ներկայացրել նրա առողջական վիճակի մասին՝ նշելով, որ կյանքին լուրջ վտանգ է սպառնում։