Բալասանյանը՝ Փաշինյանին․ «Վերջին բոյ» պետք էր տալ ուրիշ տեղ, այլ ոչ թե Գյումրիում՝ «Սև Բերդի» դեմ

PanARMENIAN.Net - Գյումրու նախկին քաղաքապետ Սամվել Բալասանյանն արձագանքել է վարչապետ Նիկոլ Փաշինյանի՝ Գյումրիում նախընտրական հանդիպման ժամանակ հնչեցրած հայտարարություններին, որտեղ անդրադարձ է եղել «Սև Բերդ» ամրոցի սեփականաշնորհման հարցին:

Անդրադառնալով «վերջին բոյի» մասին խոսքերին՝ Բալասանյանն ասել է, որ «վերջին բոյ» պետք էր տալ ուրիշ տեղ, այլ ոչ թե Գյումրիում՝ «Սև Բերդի» դեմ:

Բալասանյանն ընդգծել է, որ առողջական խնդիրների և իր ընտանիքի նկատմամբ ճնշումների պատճառով երկար ժամանակ չէր արձագանքել այս թեմային, սակայն այժմ այլևս չի կարող լռել: Նրա խոսքով՝ ամենազավեշտալին այն է, որ վարչապետը նույնիսկ տեղյակ չէ, որ գործի քննությունն առնչվում է ոչ թե «Սև Բերդ» ամրոցին, այլ դրա հարակից տարածքներին:

«Բոլոր գյումրեցիները գիտեն, թե ինչ վիճակում է գտնվել «Սև Բերդ» ամրոցը մասնավոր անձից իմ գնելուց առաջ, նորից եմ կրկնում՝ մասնավոր անձից և ինչ է դարձել հիմա: Մշակութային, մարզական, պետական (որոնց մասնակցել ես ինքդ) մակարդակի ինչ միջոցառումներ են տեղի ունեցել «Սև բերդում»՝ բացարձակապես անվճար, մինչ օրս քաղաքի տուրիստական զարդն է՝ նորից անվճար:

Ձեր խղճուկ խմբակը Գյումրիի զբոսաշրջային զարգացման համար չի արել 10 տոկոսն այն ամենի, ինչ արել է «Սև Բերդ» ամրոցը ՝ մեր քաղաք հարյուր հազարավոր այցելուներ բերելով ու դառնալով թիվ մեկ այցեքարտը:

Ինչ վերաբերում է «Սև Բերդ»-ի ապօրինի լինելուն, խորհուրդ եմ տալիս նախքան մեղադրելը, անմեղության կանխավարկած խախտելը, քո ելույթով պետական ամբողջ գործիքակազմն իմ ընտանիքի դեմ տրամադրելը՝ ստանալ ճիշտ տեղեկություններ: «Սև Բերդ» ամրոցը մեր ընտանիքը ձեռք է բերել նախկին սեփականատիրոջից այլ ոչ թե համայնքից: Այնպես որ, «Սև Բերդ» ամրոցը չի կարող դառնալ քո սիրելի #հատիկառհատիկի կոնտենտ և հայտնվել ռենջ ռովեռի կողքին»,–ասվում է հայտարարության մեջ։

Նա նաև ընդգծել է, որ իր առողջական վիճակը բարելավվելուն պես վերադառնալու է Գյումրի՝ իրավական և քաղաքական պատասխան տալու իր դեմ առաջ քաշված մեղադրանքներին: Բալասանյանը հիշեցրել է, որ իր որդու՝ Խաչատուր Բալասանյանի գործով դատական գործընթացը մտել է բաց փուլ, և շուտով ակնհայտ է դառնալու, թե որքան շինծու է այն:

Նա կոչ է արել գյումրեցիներին ակտիվորեն մասնակցել առաջիկա ավագանու ընտրություններին և մերժել իշխանություններին:

Վարչապետ Նիկոլ Փաշինյանը Գյումրիում հայտարարել է, որ տեղական ինքնակառավարման ընտրություններին մասնակցելու «ինքնահայտարարագրվածները» մեկ նպատակ ունեն՝ պաշտպանել «իրենց թալանածը»:

«Նրանք, ովքեր արդեն ինքնահայտարարագրվել են Գյումրիի ընտրություններին մասնակցելու, նրանց մասնակցությունն ունի մի համատեքստ՝ նրանք դուրս են եկել իրենց գողացված գույքերը պաշտպանելու վերջին կռվին և ճակատամարտին», –ասել է նա: