ԵԱՏՄ անդամ երկրների միջև առևտրի ծավալը 2024-ին աճել է 6.3%-ով

PanARMENIAN.Net - Եվրասիական տնտեսական հանձնաժողովի առևտրի հարցերով կոլեգիայից հայտնել են, որ 2024 թվականին ԵԱՏՄ անդամ երկրների միջև փոխադարձ առևտրի ծավալը նախորդ տարվա համեմատ աճել է 6.3%-ով, հայտնում է Արմենպրեսը։

Փոխադարձ առևտրի բաշխվածությունն ըստ երկրների հետևյալն է.

• Ռուսաստան – 55%,
• Բելառուս – 28.5%,
• Ղազախստան – 11.4%,
• Հայաստան – 3.6%,
• Ղրղզստան – 1.6%։

«2024 թվականի արդյունքներով ԵԱՏՄ-ի ընդհանուր առևտրի մեջ անդամ երկրների միջև փոխադարձ առևտրի մասնաբաժինը կազմել է 17%։Հայաստանի Հանրապետության մասով, փոխադարձ առևտրի մասնաբաժինը 2024 թվականին կազմել է երկրի արտաքին առևտրի ընդհանուր ծավալի 25.6%»,- նշվում է հանձնաժողովի պատասխանում։

Հայաստանի առևտրային համագործակցության շրջանակում ԵԱՏՄ երկրների հետ արտահանման բաշխվածությունը հետևյալն է.

• Ռուսաստան – 94.6%,
• Բելառուս – 3.4%,
• Ղազախստան – 1.6%,
• Ղրղզստան – 0.4%։

Հայաստանի ներմուծման կառուցվածքը ԵԱՏՄ երկրներից ևս ցույց է տալիս, որ հիմնական ներմուծումը կատարվել է Ռուսաստանից՝ 98.5%, իսկ մնացած 1.5%-ը բաժին է ընկել Բելառուսին (1%), Ղազախստանին (0.5%) և Ղրղզստանին (0.01%)։

Հայաստանի արտահանման ապրանքային կառուցվածքում ԵԱՏՄ ուղղությամբ 44%-ը կազմել են մեքենաները, սարքավորումները և տրանսպորտային միջոցները, իսկ 23.7%-ը՝ պարենային և գյուղատնտեսական ապրանքները։