Գյումրիի ընտրություններին մասնակցող ուժերից մեկը զրկված է քարոզչական վահանակներից

PanARMENIAN.Net - Գյումրի համայնքի ավագանու արտահերթ ընտրություններին մասնակցող ուժերից մեկը զրկվել է քարոզչական վահանակներից օգտվելու հնարավորությունից։ Հայաստանի աշխատավորական սոցիալիստական կուսակցությունը դիմել է Կենտրոնական ընտրական հանձնաժողովին՝ հայտ ներկայացնելով Գյումրիում տեղակայված 5 քմ-ից մեծ 68 վահանակներից 7-ի օգտագործման համար, սակայն դրանցից ոչ մեկը չի տրամադրվել կուսակցությանը, հայտնում է «Ականատես» դիտորդական առաքելությունը։

ԿԸՀ-ի պարզաբանմամբ՝ կուսակցությունը հայտ է ներկայացրել միայն նշված 7 վահանակների համար, և քանի որ վիճակահանությամբ դրանք բաժին են հասել այլ ուժերի, կուսակցությունը չի մասնակցել մնացած վահանակների բաշխմանը։

ԿԸՀ-ի կողմից գործարկվող՝ վահանակների բաշխման վիճակահանության ավտոմատացված համակարգը իրականացրել է բաշխումը համապատասխան համամասնությամբ։

«Կարևոր ենք համարում ընդգծել, որ վիճակահանության արդյունքները պետք է հավասար պայմաններ ապահովվեն մասնակից քաղաքական ուժերի համար, և ԿԸՀ պարտավորությունն է հետևել հավասարության պայմանի պահպանմանը։ Վիճակահանության համակարգի տեխնիկական թերությունները և/կամ իրավական թերկարգավորումները չպետք է սահմանափակեն մասնակից ուժերի՝ արդյունավետ նախընտրական քարոզչություն իրականացնելու և ընտրողների կարծիքի վրա ազդելու հնարավորությունը։

Տվյալ իրավիճակում պետք է չեղյալ համարել վիճակահանության արդյունքները կամ այլ եղանակով ապահովել վահանակների համաչափ բաշխումը, որպեսզի որևէ ուժ զրկված չլինի ընտրողների հետ հաղորդակցության՝ օրենքով սահմանված միջոցներից և ապահովվի արդարացի մրցակցություն»,–ասվում է հայտարարության մեջ։

Գյումրիի ավագանու ընտրություններն անցկացվելու են մարտի 30–ին։