ՌԴ–ում ապրիլից ուժի մեջ կմտնի միգրանտների՝ ռուսերենին չտիրապետող երեխաներին առնչվող օրենքը

PanARMENIAN.Net - Ապրիլի 1-ից Ռուսաստանում ուժի մեջ է մտնում օրենքը, ըստ որի՝ միգրանտների երեխաները կարող են ընդունվել դպրոց միայն ռուսերենին տիրապետելու պարագայում։ Այդ մասին հայտնել է Պետդումայի նախագահ Վյաչեսլավ Վոլոդինը իր Telegram-ալիքում։

«Միգրանտների երեխաներին չեն ընդունի դպրոցներ առանց ռուսերենի իմացության։ Նրանց համար, երբ ընդունվում են հանրակրթական հաստատություն, պարտադիր կդառնա մեր երկրի տարածքում օրինական գտնվելու իրավունքի և ռուսերենի տիրապետման մակարդակի ստուգումը», — գրել է նա, հայտնում է ՏԱՍՍ–ը։

Վոլոդինը նշել է նաև երկու այլ օրենքների մասին, որոնք նույնպես ուժի մեջ կմտնեն ապրիլի սկզբից։ Դրանցից մեկը վերաբերում է ճամբարներում դաստիարակչական միասնական ծրագրի կատարելագործմանը, իսկ մյուսը՝ հիփոթեքային և ավտովարկերի սահմանափակումներին։

«Օրացուցային պլանի մեջ կմտնեն ծնողների օրերը, երեխաների ծանոթությունն արվեստի գործերի հետ և այլ միջոցառումներ, որոնք ուղղված են հայրենասիրության, աշխատասիրության, Հայրենիքի պաշտպանների հիշատակի նկատմամբ հարգանքի ձևավորմանը», — նշել է Վոլոդինը՝ խոսելով ճամբարներում փոփոխությունների մասին։

Բացի այդ, Պետդումայի նախագահը հայտնել է, որ ապրիլին սոցիալական թոշակները ինդեքսավորվելու են։ Աճը կկազմի 14.75%։