Թանդիլյան․ Փաշինյանը վաղուց չի արտահայտում հայ ժողովրդի հավաքական ինքնությունը

PanARMENIAN.Net - «Ապրելու երկիր» կուսակցության նախագահ Մանե Թանդիլյանը հայտարարել է, որ վարչապետ Նիկոլ Փաշինյանը վաղուց չի արտահայտում հայ ժողովրդի հավաքական ինքնությունը և կապ չունի ժողովրդի հետ։ Այս մասին նա ասել է Ծիծեռնակաբերդի հուշահամալիրում լրագրողների հետ զրույցի ընթացքում։

«Նա վաղուց կապ չունի հայ ժողովրդի հետ»,- ասել է նա, գրում է Aysor.am-ը։

Թանդիլյանն ընդգծել է, որ իշխող «Քաղաքացիական պայմանագիր» կուսակցության ներկայացուցիչները զավթել են իշխանությունը և այժմ փորձում են պահպանել միայն իրենց կենսաբանական գոյությունը։

«Եթե մենք չսթափվենք՝ մեզ ծանր օրեր են սպասվում»,- նշել է նա։

Վարչապետ Նիկոլ Փաշինյանը դատապարտել է Ադրբեջանի և Թուրքիայի դրոշների այրման դեպքը։ ՀՀ վարչապետի մամուլի քարտուղար Նազելի Բաղդասարյանը փոխանցել է, որ Վարչապետ Փաշինյանը դատապարտում է այդ գործելակերպը, այն համարելով անպատասխանատու և անընդունելի։

Ապրիլի 23-ին Երևանում տեղի է ունեցել ավանդական ջահերով երթը, որն այս տարի անցել է «Մի՛ ուրացիր» կարգախոսով։Մինչև երթի մեկնարկը մասնակիցները այրել են Թուրքիայի և Ադրբեջանի պետական դրոշները՝ որպես բողոքի գործողություն ժխտողական քաղաքականության դեմ։