Գյումրիում պարեկների են ծեծել

PanARMENIAN.Net - Ապրիլի 27-ին, ժամը 23-ի սահմանում, Շիրակի մարզի պարեկները Գյումրիի Երևանյան խճուղում կանգնեցրել են «ՎԱԶ-21074» մակնիշի ավտոմեքենա, որը վարել է Հալաբյան փողոցի բնակիչ 22-ամյա երիտասարդ։

Սթափության ստուգումից հետո պարեկը տեղեկացրել է վարորդին, որ նա կորցնում է իր վարորդական իրավունքը՝ օրենքի պահանջի համաձայն։ Վարորդը, լսելով այդ մասին, բռունցքով հարվածել է պարեկների դեմքին, իսկ նրա երկու ուղևորները ևս միջամտել են, քաշքշել ու հարվածել ոստիկաններին, հայտնում է ոստիկանությունը։

Ոստիկանության ծառայողական գործողություններին խոչընդոտած անձինք ձերբակալվել և տեղափոխվել են Համայնքային ոստիկանության Կումայրիի բաժին, իսկ ավտոմեքենան առգրավվել և վերցվել է պահպանության։ Վարորդի խուզարկության ընթացքում հայտնաբերվել է գաղտնի փականով դանակ։

Ստուգվել է նաև ուղևորների սթափությունը, և պարզվել է, որ նրանք ևս ալկոհոլի ազդեցության տակ են գտնվել։

Կազմվել են համապատասխան փաստաթղթեր, իսկ ձերբակալվածները ներկայացվել են Շիրակի մարզային քննչական վարչություն։ Նախապատրաստվել է քրեական վարույթ, որի շրջանակում պարզվում են բոլոր հանգամանքները։

ՀՀ քրեական օրենսգիրքը նախատեսում է քրեական պատասխանատվություն պաշտոնատար անձի օրինական ծառայողական գործողություններին միջամտելու համար, իսկ բռնության կիրառման պարագայում նախատեսված է բացառապես ազատազրկման ձևով պատիժ։

Ոստիկանությունը հորդորում է քաղաքացիներին չմիջամտել ոստիկանության ծառայողների օրինական գործառույթներին և պարտադիր ենթարկվել նրանց օրինական պահանջներին, քանի որ հակառակ դեպքում նրանք կանգնելու են քրեաիրավական խիստ հետևանքների առաջ։