Կանադացի պատգամավորը մտահոգություն է հայտնել սրբազանների ազատազրկման վերաբերյալ

PanARMENIAN.Net - Կանադայի Դաշնային խորհրդարանի անդամ Գարնեթ Գենուիսը հայտարարել է, որ կիսում է շատ հայերի մտահոգությունը Բագրատ և Միքայել սրբազանների բանտարկության վերաբերյալ։

Նա նշել է, որ նախորդ տարի Կանադայի խորհրդարանում հանդիպելու հնարավորություն է ունեցել Բագրատ արքեպիսկոպոս Գալստանյանի հետ, հայտնում է «Սրբազան պայքարը»։

«Հայաստանում ժողովրդավարությունը, կրոնական ազատությունը և երկրի ապագայի մասին ազատ ու բաց քննարկումները պետք է պաշտպանված լինեն՝ հիմա առավել, քան երբևէ»,–նշել է նա։

Հունիսի 25–ի առավոտյան իրավապահ մարմինները սկսել են խուզարկություններ «Սրբազան պայքար» շարժման կողմնակիցների հասցեներում: Քննչական կոմիտեն հայտարարել է, որ «Սրբազան պայքար» անվանումով շարժման մասնակիցները և ղեկավարները «պլանավորել էին ՀՀ-ում իրականացնել աhաբեկչական և իշխանությունը զավթելուն ուղղված գործողություններ»։ Ավելի ուշ հայտնի դարձավ, որ շարժման առաջնորդ Բագրատ սրբազանը 2 ամսով կալանավորվել է։ Կալանավորվել է ևս 14 անձ։

Հունիսի 27–ի առավոտյան մոտ 30 դիմակավորված անձ ներխուժել էր Շիրակի թեմի առաջնորդարան։ Շիրակի թեմի առաջնորդ Միքայել արքեպիսկոպոս Աջապահյանը, սակայն, Մայր աթոռ Սուրբ Էջմիածնում էր, որտեղ Քահանայից ժողով էր նախատեսված։ ԱԱԾ-ն մտել էր Մայր աթոռի տարածք՝ ձերբակալելու Աջապահյանին։ Սրբազանը հայտարարել էր, որ պատրաստվում է գնալ իրավապահների հետ, բայց տեղի ունեցած հրմշտոցից հետո նա կաթողիկոսի հետ գնաց Վեհարան։ Ավելի ուշ նա ներկայացավ ՔԿ և դատարանի որոշմամբ կալանավորվեց 2 ամսով։ Աջապահյանի նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։