Թուրքիայից զբոսաշրջիկների թիվը ՀՀ-ում ավելացել է

PanARMENIAN.Net - Ըստ Վիճակագրական կոմիտեի տվյալների, 2025 թվականի առաջին կիսամյակում Հայաստան ժամանած զբոսաշրջիկների թիվը կազմել է 907,135։ Նախորդ տարվա նույն ժամանակահատվածում այցելուների թիվը եղել է 946.162, այսինքն՝ արձանագրվել է ընդհանուր նվազում։

Միաժամանակ, աճ է գրանցվել Թուրքիայից զբոսաշրջիկների շրջանում։ Եթե 2024-ի առաջին կիսամյակում Հայաստան է ժամանել 5539 թուրք զբոսաշրջիկ, ապա 2025-ին նրանց թիվը հասել է 5756-ի, գրում է »Փաստինֆոն»։

Պաշտոնական հաղորդագրության մեջ նշվում է նաև մեկ ադրբեջանցի զբոսաշրջիկի այցի մասին։

Վիճակագրական կոմիտեի հրապարակած տվյալներով՝ 2025 թվականի առաջին կիսամյակում Հայաստան այցելած զբոսաշրջիկների թվում առաջատար են Ռուսաստանի քաղաքացիները՝ 338,052 մարդ։ Այնուամենայնիվ, այս թիվը զգալիորեն պակասել է նախորդ տարվա նույն ժամանակահատվածի համեմատ․ 2024-ի առաջին կիսամյակում ՀՀ էր ժամանել 395,688 ռուս զբոսաշրջիկ։

Այցելուների թվում մեծ է նաև Իրանի քաղաքացիների թիվը՝ 78,045 մարդ, ինչպես նաև ԱՄՆ քաղաքացիների հոսքը՝ 16,964։

Այլ երկրներից Հայաստան այցելածների թվերը հետևյալն են․

• Ավստրալիայից՝ 1551
• Ավստրիայից՝ 2847
• ԱՄԷ-ից՝ 4260
• Բելառուսից՝ 7646
• Բելգիայից՝ 3173
• Բուլղարիայից՝ 3731
• Գերմանիայից՝ 12.361
• Եգիպտոսից՝ 2059
• Իսպանիայից՝ 3506
• Իտալիայից՝ 8385
• Իսրայելից՝ 1734
• Ուկրաինայից՝ 11,484 (նույնպես նվազում նախորդ տարվա համեմատ)
• Չինաստանից՝ 15,582։

ՄԱԿ-ի Զբոսաշրջության համաշխարհային կազմակերպության (ԶՀԿ) մեթոդաբանությամբ միջազգային զբոսաշրջիկ է համարվում այն անձը, որը մեկնում է իր մշտական բնակության վայրից առնվազն 24 ժամով, բայց ոչ ավել քան մեկ տարով՝ հանգստի, բուժման, հարազատներին այցելելու, գործնական, կրոնական կամ այլ նպատակներով։ Աշխատանքային գործունեության համար մեկնածները զբոսաշրջիկ չեն համարվում։