Փաստաբան․ Կարապետյանի կալանքի երկարաձգումից 1 ամիս անց որևէ քննչական գործողություն չի արվել

PanARMENIAN.Net - Սամվել Կապապետյանի պաշտպան Արմեն Ֆերոյանը փաստաբանների խմբի ասուլիսի ժամանակ ասել է, որ բազմաթիվ դատական ակտերով հաստատվել է գործարար, բարերար Սամվել Կարապետյանի նկատմամբ քննչական մարմնի գործողությունների ապօրինությունները:

Նախօրեին հակակոռուպցիոն վերաքննիչ դատարանը մերժել էր Կարապետյանի կալանքը վերացնելու պաշտպանական կողմի միջնորդությունը և Կարապետյանին թողել կալանքի տակ:

«Այս գործով քննչական մարմնի գործողությունները կրում են և՛ ուղղորդված, և՛ բացառապես ապօրինի բնույթ։ Հաստատվել են նաև Առաջին ատյանի դատարանի կողմից կատարված որոշումների ապօրինությունները։ Խոսք վերաբերում է խուզարկությունների որոշումներին, որոնք մենք բողոքարկել ենք, և որոնց մեծ մասը ճանաչվել են ապօրինի։ Ապօրինի է ճանաչվել նաև Սամվել Կարապետյանի ձերբակալությունը»,– ասել է Ֆերոյանը, հայտնում է Sputnik Արմենիան։

Նրա գնահատմամբ՝ արդարադատությունն այս գործում իսպառ բացակայում է։

Փաստաբանը նաև հիշեցրել է, որ Կարապետյանին ի սկզբանե առաջադրվել են մեղադրանքներ փողերի լվացման, խարդախության և հարկերից խուսափելու համար, սակայն դրանք որևէ ձևով չեն հաստատվել և դատարան չեն ներկայացվել։

«Այսինքն` մենք գործ ունենք միայն կոչի դրվագի հետ, որի մասով փաստաբանական կողմը ձեռք է բերել համալիր փորձագիտական եզրակացություն, որ իշխանությունը զավթելու կոչի վերաբերյալ որևէ հանգամանք առկա չէ։ Լեզվաբանների, պրոֆեսորների կողմից լեզվաբանական տեսանկյունից վերլուծվել է Կարապետյանի խոսքը և հիմնավորել, որ նրա կոչի մեջ իշխանություն զավթելու տարրեր չկան»,–ասաց Ֆերոյանը։

Նա նշել է, որ սա քննիչ մարմնի կողմից ներկայացվող անհիմն պնդում է իշխանությունը զավթելու կոչի մասին։

Իր հերթին Կարապետյանի մեկ այլ պաշտպան՝ Լիանա Գասպարյանը, ուշադրություն է հրավիրել այն փաստին, որ կալանքի ժամկետի երկարացումից անցել է գրեթե մեկ ամիս, սակայն քննիչները այս ընթացքում որևէ քննիչ գործողություն չեն իրականացրել։

«Հարց է առաջանում, այս դեպքում ինչու է Սամվել Կարապետյանը մինչ օրս մնում ապօրինի անազատության մեջ։ Բոլորս էլ հասկանում ենք, թե ինչու է Կարապետյանը ենթարկվում քաղաքական հետապնդման։ Իսկ եթե դա լիներ զուտ իրավաբանություն, ապա այսպես ասեմ՝ քրեական օրենսգիրքը, եթե ոտքեր ունենար, ոտքերը վերցրած կփախչեր այս ապօրինություններից», - ասel 1 Գասպարյանը։

Նա ընդգծել է, որ իր տասնամյա իրավաբանական գործունեության ընթացքում նման ծայրահեղ օրինախախտումներով քրեական գործ չի հանդիպել։

Սամվել Կարապետյանի պաշտպանության խորհուրդը հանդես է եկել հայտարարությամբ՝ արձագանքելով Վերաքննիչ դատարանի որոշմանը, որով վերջինս մնալու է կալանքի տակ։ Հայտարարության մեջ ասվում է, որ «որևէ ապօրինություն չի կարող հուսահատեցնել» իրենց։