էլեկտրամոբիլների լիցքավորման նոր հնարավորություններ կստեղծվեն

PanARMENIAN.Net - Ազգային ժողովն առաջին ընթերցմամբ ընդունել է օրենսդրական նախաձեռնություն, որով քաղաքացիներին թույլ է տրվում առանց լրացուցիչ բաժանորդագրության՝ բնակարանից դեպի իրենց ավտոտնակ կամ կայանատեղի անցկացնել էլեկտրաէներգիա՝ էլեկտրամոբիլների լիցքավորման նպատակով։

«Էներգետիկայի մասին» օրենքում նախատեսվող փոփոխությունները վավերացվել են սեպտեմբերի 11-ին կայացած նիստում, հայտնում է Արմենպրեսում։

Փոփոխությունների համաձայն, սպառողին բաշխված էլեկտրաէներգիան կարող է օգտագործվել ոչ միայն սպառման համակարգի տեղադրման վայրում, այլև դրա սահմաններից դուրս՝ սպառողի սեփական ավտոկայանատեղիում կամ բնակելի նշանակության այլ տարածքում, եթե այդ տարածքը գրանցված է որպես առանձին գույքային միավոր: Էլեկտրաէներգիայի միացումը պետք է իրականացվի սպառողի կողմից՝ պահպանելով գործող իրավական ակտերի պահանջները։

«Նախագիծը նախատեսում է էլեկտրամոբիլների լիցքավորման համար ստեղծել նոր հնարավորություններ՝ նույն սպառողի համար տեխնիկական հնարավորությունների դեպքում ապահովելով լիցքավորման կայանի միացումը էլեկտրական ցանցին առանց հավելյալ միացման վճարի», – նշել է նախագծի համահեղինակ Ծովինար Վարդանյանը։

Նախագծով սահմանվում է նաև, որ էլեկտրամոբիլների լիցքավորման ծառայությունը լիցենզավորման ենթակա չէ, ինչը նշանակում է, որ յուրաքանչյուր անձ կարող է մատուցել նման ծառայություն առանց հատուկ թույլտվության։

Նախաձեռնության հեղինակներն են ԱԺ նախագահ Ալեն Սիմոնյանը և «Քաղաքացիական պայմանագիր» խմբակցության պատգամավորներ Ծովինար Վարդանյանն ու Արուսյակ Մանավազյանը։