Պետրոսյան․ Moody’s-ի կողմից վարկանիշի իջեցումը կապված է ՀԷՑ-ում մեր բացահայտումների հետ

PanARMENIAN.Net - ՀԷՑ-ի ժամանակավոր կառավարիչ Ռոմանոս Պետրոսյանը, խոսելով Moody’s վարկանիշային կազմակերպության կողմից Հայաստանի վարկանիշի նվազեցման մասին, տարօրինակ է համարել այն փաստը, որ պետության կողմից լիցենզավորված կազմակերպությունը կարող է ունենալ ավելի բարձր վարկանիշ, քան հենց պետությունը։

«Ինձ համար տարօրինակ էր, որ պետության կողմից լիցենզավորված ընկերությունը պետության սուվերեն վարկանիշից բարձր գնահատական է ունենում։ Դարձյալ իմ անձնական վերլուծություն է, որ վարկանիշն իջեցնելը կապված էր այն բացահայտումների, որոշ փաստերի հետ, որոնք երևան եկան ժամանակավոր կառավարչի գործունեության բերումով»,-ասել է նա, հայտնում է Panorama.am-ը։

Օրեր առաջ իր ասուլիսում ԿԲ նախագահ Մարտին Գալստյանը, խոսելով Հայաստանի վարկանիշի իջեցման մասին, հույս էր հատնել, որ հարցը կապված է ՀԷՑ-ի անորոշությունների հետ, այն արագ կլուծվի, որի արդյունքում մեր վարկանիշի նվազումը կկրի կարճաժամկետ բնույթ։

Ռոմանոս Պետրոսյանն այս մեկնաբանությունը բավարար է համարում, ասել է՝ ինքը գործում է օրենքով իրեն վերապահված լիազորությունների շրջանում, այդ օրենսդրական փաթեթը հիմա վիճարկվում է ՍԴ-ում։

«Քանի դեռ որևէ վճիռ չկա, որևէ դատական ակտ չկա, բնականաբար ամեն ինչ իրավաչափ ու օրինաչափ է»,-ասել է Պետրոսյանը։

ՀԷՑ-ի կառավարումը վերցնելու իշխանության գործողություններից հետո միջազգային հեղինակավոր Moody’s վարկանիշային կազմակերպությունը նվազեցրել է ընկերության վարկանիշը՝ հետագա գործունեության կանխատեսումը «կայունից» դարձնելով «բացասական»։ՀԷՑ-ի վարկանիշների իջեցման պատճառը ընկերությանն առնչվող օրենսդրական փոփոխություններն էին, որը թույլ կտա կառավարությանը ազգայնացնել Սամվել Կարապետյանին պատկանող բաշխիչ ցանցերը: