Երևանի 4 շրջանում փոշու պարունակությունը գերազանցել է թույլատրելի կոնցենտրացիան

PanARMENIAN.Net - Հիդրոօդերևութաբանության և մոնիթորինգի կենտրոնը հրապարակել է նոյեմբերի 12-18-ն ընկած ժամանակահատվածում Երևանում մթնոլորտային օդի մոնիթորինգի արդյունքները, համաձայն որոնց՝ մի շարք վարչական շրջաններում գրանցվել է սահմանված նորման գերազանցող փոշու պարունակություն։

Մասնավորապես՝

• Կենտրոն վարչական շրջանում փոշու պարունակությունը թույլատրելի շեմը անցել է նոյեմբերի 12-14-ը, ինչպես նաև 16-ին և 18-ին։
• Արաբկիր վարչական շրջանում այդ ցուցանիշը բարձր է եղել նոյեմբերի 13-ից 15-ն ընկած օրերին։
• Նույն օրերին՝ նոյեմբերի 13-15-ը, սահմանային նորման գերազանցվել է նաև Շենգավիթում։
• Նոր Նորքում փոշոտվածությունը բարձր է եղել նոյեմբերի 14-ին։

Բացի այդ, ազոտի երկօքսիդի մակարդակը ևս որոշ հատվածներում անցել է թույլատրելի շեմը՝

• Կենտրոն վարչական շրջանում արձանագրվել է գերազանցում նոյեմբերի 13-ին, ինչպես նաև 17-ին ու 18-ին։
• Արաբկիրում բարձրացման դեպք գրանցվել է նոյեմբերի 17-ին։
• Նոր Նորքում նույն օրը՝ նոյեմբերի 17-ին, նույնպես արձանագրվել է բարձրացված ցուցանիշ։
• Շենգավիթում ազոտի երկօքսիդի նորմա գերազանցող պարունակություն չի հայտնաբերվել։

Ծծմբի երկօքսիդի պարունակությունը մայրաքաղաքի բոլոր հատվածներում մնացել է սահմանված թույլատրելիի սահմաններում։