Նախագիծ․ Թափառող շներն ապաստան կստանան, կենդանիներին լքողները պատասխանատվություն կկրեն

PanARMENIAN.Net - Ազգային ժողովի հանձնաժողովում առաջին ընթերցմամբ ուսումնասիրվել է «Կենդանիների նկատմամբ պատասխանատու վերաբերմունքի մասին» օրենքի նախագիծը, որը ներկայացվել է պատգամավորներ Մերի Գալստյանի և Արուսյակ Մանավազյանի կողմից։

Այս նախագիծը միտված է կարգավորել այն իրավական հարցերը, որոնք առնչվում են ընտանի, թափառող, ծառայողական, ինչպես նաև ժամանցային կամ ցուցադրման նպատակներով օգտագործվող կենդանիների հետ, հայտնում է Factor.am-ը։

Փաթեթում առանձնահատուկ տեղ է տրվել թափառող կենդանիների, մասնավորապես՝ շների խնդրի լուծմանը։ Նախատեսված է կառուցել երեք կացարան տարբեր մարզկենտրոններում՝ որպես վայրեր, որտեղ ժամանակավոր խնամք կստանան կորած, լքված կամ թափառող կենդանիները։ Այս կենտրոններում կապահովվի կենդանիների կերակրումը, բուժումը և պահպանումը, ներառյալ նաև այն կենդանիները, որոնք ժամանակավորապես հանձնվել են խնամքի։

Նախագծում ամրագրված է նաև պատասխանատվություն սահմանել կենդանիներին լքելու արարքների համար։

Հանձնաժողովը դրական եզրակացություն է տվել օրինագծին։