Տավուշում շտապօգնության մեքենա է կողաշրջվել, Արարատում 14 մեքենա է բախվել

14 հունվարի 2026 - 12:27 AMT

PanARMENIAN.Net - Հունվարի 14-ին ժամը 06:30-ի սահմաններում շտապօգնության ավտոմեքենան Երևան-Սևան-Իջևան ճանապարհի Թեղուտ բնակավայրի վարչական տարածքում ճանապարհի մերկասառույցի պատճառով դուրս է եկել երթևեկելի գոտուց և կողաշրջվել, հայտնում է Shamshyan.com-ը:

Վթարի հետևանքով բուժքույրը մարմնական վնասվածքով տեղափոխվել է «Դիլիջան» բժշկական կենտրոն։

Դեպքի առթիվ քննչական բաժնում քրեական վարույթ է նախաձեռնվել, որտեղ իրականացվում է վարորդի և վիրավորված անձի ինքնության պարզում։

Ըստ հրապարակման՝ շտապօգնության ավտոմեքենան գրանցված է Տավուշի մարզի Բերդ բնակավայրում գտնվող «Բերդ» բժշկական կենտրոնի հաշվեկշռում, և այն Երևանից հետ է վերադարձել նշված կենտրոն, նախապես հիվանդ տեղափոխելով մայրաքաղաք։

Բացի այդ, նմանատիպ մեկ այլ միջադեպ էլ տեղի է ունեցել Արարատի մարզում։ Ժամը 07։50-ի սահմաններում, Երևան-Երասխ ավտոճանապարհի Մարմարաշեն գյուղի կամրջի մոտակայքում՝ մոտ 1 կիլոմետրանոց հատվածում, մերկասառույցի պատճառով բախվել է 14 տրանսպորտային միջոց։

Նախնական տվյալներով՝ այս դեպքով տուժածներ չկան։ Սակայն ըստ կայքի աղբյուրների՝ որոշ վարորդներ դեպքի վայրում նշել են, թե երեք մարդ մարմնական վնասվածք է ստացել, ինչի ճշգրտմամբ այժմ զբաղվում են պարեկային ծառայությունը և ոստիկանության Մասիսի բաժնի աշխատակիցները։

Նշվում է, որ ճանապարհի ամբողջ հատվածը եղել է սառած, իսկ սպասարկող կազմակերպությունը որևէ աշխատանք չի իրականացրել՝ աղ ու ավազի խառնուրդով այն մշակելու ուղղությամբ։ Բախման հետևանքով մի շարք մեքենաներ դուրս են եկել երթևեկելի գոտուց։