Փոխնախարար․ Գեղասահքի ֆեդերացիան վիզայի աջակցության հարցով ԿԳՄՍ նախարարությանը չի դիմել

PanARMENIAN.Net - Հայաստանի գեղասահքի ֆեդերացիան Եվրոպայի առաջնությանը մասնակցելու նպատակով վիզայի աջակցություն ստանալու հարցով չի դիմել ՀՀ կրթության, գիտության, մշակույթի և սպորտի նախարարություն: Այդ մասին հայտնել է ԿԳՄՍ նախարարի տեղակալ Հասմիկ Ավագյանը՝ անդրադառնալով ֆեդերացիայի տարածած հաղորդագրությանը, ըստ որի Հայաստանի գեղասահքի հավաքականի անդամներ Սիմոն Դանիլյանցը և Կարինա Ակոպովա-Նիկիտա Ռախմանին զույգը չեն կարող մասնակցել Եվրոպայի առաջնությանը՝ չստանալով մուտքի արտոնագիր Մեծ Բրիտանիայի դեսպանությունից։

Ավագյանի խոսքով՝ նախարարությունը համապատասխան արձագանք է տալիս այն դեպքում, երբ ֆեդերացիաները ներկայացնում են պաշտոնական գրություն։ Դրա հիման վրա, համագործակցելով ՀՀ արտաքին գործերի նախարարության հետ, ներկայացվում է միջնորդություն Հայաստանում գործող դիվանագիտական ներկայացուցչություններին՝ անհրաժեշտության դեպքում կիրառելով նաև արագացված ընթացակարգ, հայտնում է Արմենպրեսը:

Նախարարությունից նշել են, որ նախորդ տարիներին՝ 2023, 2024 և 2025 թվականներին, գեղասահքի ֆեդերացիան վիզայի աջակցության նպատակով ներկայացրել է նմանատիպ գրություններ, որոնց տրվել է ընթացք՝ համաձայն սահմանված կարգի։

Եվրոպայի գեղասահքի առաջնությունը կայանում է Շեֆիլդում՝ 2026 թվականի հունվարի 12-18-ը։