Ըստ Թրամփի՝ Խաղաղության խորհուրդը կգործակցի ՄԱԿ-ի հետ

PanARMENIAN.Net - ԱՄՆ նախկին նախագահ Դոնալդ Թրամփը, որն այսուհետ կգլխավորի նորաստեղծ Խաղաղության խորհուրդը, իր ելույթում ասել է, որ Խորհրդի փոխգործակցությունը ՄԱԿ-ի հետ կարող է հակամարտությունների գլոբալ կարգավորման եզակի ձևաչափ ստեղծել։ Նա այդ մասին ասել է Դավոսում ընթացող Համաշխարհային տնտեսական ֆորումի շրջանակում փաստաթղթի ստորագրման արարողության ժամանակ:

«ՄԱԿ-ն ահռելի պոտենցիալ ունի։ Եվ ես կարծում եմ, որ Խաղաղության խորհրդի՝ այստեղ հավաքած մարդկանց և Միավորված ազգերի կազմակերպության համադրությունը կարող է իսկապես եզակի մի բան դառնալ աշխարհի համար՝ ամբողջ աշխարհի, ոչ թե միայն ԱՄՆ-ի։ Մենք պատրաստվում ենք խաղաղություն հաստատել ամբողջ աշխարհում, և, Աստված վկա, դա մեծ ժառանգություն կլինի բոլորիս համար»,-հայտարարել է ԱՄՆ առաջնորդը, հայտնում է Sputnik Արմենիան:

ԱՄՆ նախագահն ասել է, որ նորաստեղծ կազմակերպության կազմում ուզում է տեսնել «իրական իշխանություն և ազդեցություն ունեցող» առաջնորդների, այլ ոչ թե «քաղաքականության մեջ նորածինների»։ Թրամփը հայտարարել է, որ ՌԴ նախագահ Վլադիմիր Պուտինը ևս համաձայնել է լինել խորհրդի կազմում։

«Հենց որ այս Խաղաղության խորհուրդը վերջնականապես ձևավորվի, մենք կկարողանանք անել փաստացի ինչ ցանկանանք։ Մենք դա ՄԱԿ-ի հետ համատեղ ենք անելու»,-ասել է նա:

Արարողությանը մասնակցել են նաև ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը։ Նրանք հիմանդիր անդամների թվում են:

Ավելի վաղ ՌԴ նախագահ Վլադիմիր Պուտինը հայտնել էր պաղեստինցի ժողովրդին աջակցելու նպատակով Խաղաղության խորհրդին 1 մլրդ դոլար հատկացնելու պատրաստակամության մասին։ Ըստ առկա տեղեկությունների՝ այդպիսի անդամավճարը պարտադիր է նորաստեղծ խորհրդի մշտական անդամների համար։