2025-ին Հակակոռուպցիոն կոմիտեում քննվող քրվարույթներով ձերբակալվել է 590 անձ

24 փետրվարի 2026 - 16:23 AMT

PanARMENIAN.Net - Հակակոռուպցիոն կոմիտեում քննվող քրեական վարույթների շրջանակում 2025 թվականին ձերբակալվել է 590 անձ։ Այդ մասին ԱԺ պետական-իրավական հարցերի մշտական հանձնաժողովի նիստում ասել է Հակակոռուպցիոն կոմիտեի նախագահ Արթուր Նահապետյանը:

Նա ներկայացրել է կառույցի արդյունավետության բարձրացմանն ուղղված քայլերը և իրականացված կառուցվածքային փոփոխությունները, այդ թվում՝ տարածքային ստորաբաժանումներում, ապա անդրադարձել է քննված քրեական վարույթներին։

2025 թվականի ընթացքում Կոմիտեի քննիչների վարույթում քննվել է 2585 քրեական վարույթ (ներառյալ կրկնակի վարույթները), որոնցից ավարտվել է 890-ը։ Ավարտված գործերից 273-ը՝ 661 անձի վերաբերյալ մեղադրական եզրակացությամբ, ուղարկվել է դատարան, իսկ 617-ը կարճվել է։ Կարճված գործերից 54-ի վերաբերյալ որոշումները դատախազը չի հաստատել, ինչպես նաև դատարան ուղարկված 8 գործի մեղադրական եզրակացությունը չի հաստատվել դատախազի կողմից։

2025-ին մեղադրական եզրակացությամբ դատարան ուղարկված գործերով դատի է տրվել 298 հանրային ծառայող։ Բացի այդ, առանձնացվել է 19 վարույթ և ներառվել հաղորդման մեջ։

Կոռուպցիոն հոդվածներով նախաձեռնված վարույթներից 2025-ին կարճվել է 565 գործ, որոնցից 433-ը՝ ռեաբիլիտացնող, իսկ 132-ը՝ ոչ ռեաբիլիտացնող հիմքերով։ Ոչ ռեաբիլիտացնող հիմքերով քրեական հետապնդում չիրականացնելու կամ այն դադարեցնելու որոշումներ են կայացվել 547 անձի վերաբերյալ։

Հարցուպատասխանի ձեւաչափում Արթուր Նահապետյանը ներկայացրել է կոռուպցիոն երեւույթների վերացմանն ու բացառմանն ուղղված քայլերը, խոսել ապօրինի հարստացմանն ու ապօրինի գույքի ձեռքբերմանը վերաբերող գործերի մասին: Անդրադարձ է եղել իրականացվող վարույթների մասով Հակակոռուպցիոն կոմիտեի ծանրաբեռնվածությանը, դատարաններում մեղադրական դատական ակտերի վիճակագրությանը:

2024 թվականի համեմատությամբ 2025-ին քննված վարույթների թիվն աճել է 12.9 տոկոսով, իսկ ավարտված գործերինը՝ 4.8 տոկոսով։