ՆԳՆ. էկոնոմիկայի նախարարության մասնավոր պահնորդական ընկերության աշխատակիցը պատահական կրակոց է արձակել

PanARMENIAN.Net - էկոնոմիկայի նախարարության մասնավոր պահնորդական ընկերության աշխատակիցը պատահական կրակոց է արձակել, հայտնել է Ներքին գործերի նախարարությունը՝ պարզաբանելով Էկոնոմիկայի նախարարությունում տեղի ունեցած կրակոցի դեպքը:

«Ի պատասխան ԶԼՄ հարցումների՝ ապրիլի 6-ին, ժամը 16.56-ին բժշկական կենտրոնից ՆԳՆ 112 օպերատիվ կառավարման կենտրոն հաղորդում է ստացվել, որ շտապօգնության խումբը «ձախ սրունքի առաջային մակերեսի հրազենային վիրավորում» ախտորոշմամբ բուժօգնության է տեղափոխել մի անձի։

Նախնական տվյալներով՝ ՀՀ էկոնոմիկայի նախարարության մասնավոր պահնորդական ընկերության աշխատակիցը հերթափոխի ընդունման-հանձնման ժամանակ իրեն ամրակցված զենքից պատահական կրակոց է արձակել։

Տեղափոխվածի առողջական վիճակը գնահատվում է բավարար»,-ասվում է հաղորդագրության մեջ:

Ավելի վաղ հայտնի էր դարձել, որ նախարարությունից Հերացու անվան թիվ 1 համալսարանական հիվանդանոց է տեղափոխել մի քաղաքացու։ Տեղում պարզվել է, որ վիրավորը մոտ 21 տարեկան երիտասարդ է, ով ձախ սրունքի հատվածում ստացել է հրազենային վնասվածք: