Թրամփ․ Այս գիշեր մի ամբողջ քաղաքակրթություն կկործանվի

PanARMENIAN.Net - Այս գիշեր մի ամբողջ քաղաքակրթություն կկործանվի, և այն այլևս երբեք հնարավոր չի լինի վերականգնել, հայտարարել է ԱՄՆ նախագահ Դոնալդ Թրամփը Truth Social սոցիալական ցանցում։

«Ես չեմ ցանկանում, որ դա տեղի ունենա, բայց հավանաբար այդպես էլ կլինի: Այնուամենայնիվ, այժմ, երբ մենք ունենք ռեժիմի լիակատար փոփոխություն, որտեղ գերակշռում են այլ, ավելի խելացի և պակաս արմատական մտքեր, գուցե հեղափոխականորեն հրաշալի ինչ-որ բան տեղի ունենա, ո՞վ գիտի։ Մենք դա կիմանանք այս գիշեր՝ աշխարհի երկար և բարդ պատմության ամենակարևոր պահերից մեկը։ 47 տարվա շորթումը, կոռուպցիան և մահը վերջապես կավարտվեն», - գրել է նա:

ԱՄՆ փոխնախագահ Ջեյ Դի Վենսն իր հերթին ասել է, որ ԱՄՆ-ի կողմից Իրանի դեմ իրականացվող գործողության հիմնական ռազմական նպատակները արդեն կատարված են, գրում է ՌԻԱ Նովոստին:

«Կա ևս մի բան, որ մենք կցանկանայինք անել... Բայց ընդհանուր առմամբ ԱՄՆ-ի ռազմական խնդիրները կատարված են», - ասել է Վենսը Հունգարիայի վարչապետ Վիկտոր Օրբանի հետ համատեղ մամուլի ասուլիսի ընթացքում։

Ավելի վաղ IRNA իրանական պետական գործակալությունը հաղորդել է, որ Թեհրանը, պատասխանելով ԱՄՆ առաջարկին, մերժել է հրադադարի հնարավորությունը՝ ընդգծելով հակամարտության լիակատար դադարեցման և պատժամիջոցների վերացման անհրաժեշտությունը։ Բացի այդ, պատասխանում ներկայացված են եղել Իրանի պահանջները՝ կապված Հորմուզի նեղուցով անվտանգ նավարկության ապահովման հետ։ Այդ ֆոնին, ԱՄՆ-ի հնարավոր ցամաքային գործողության մասին տեղեկությունների պայմաններում, Իրանում մեկնարկել է կամավորների հավաքագրման արշավ երկրի պաշտպանության համար։

Նախորդ օրը Թրամփը սպառնացել է Իրանին, որ ապրիլի 7-ին կոչնչացնի «կամուրջները և էլեկտրակայանները»՝ կոչ անելով բացել Հորմուզի նեղուցով նավարկության համար, հակառակ դեպքում, նրա խոսքով, իրանցիները «կապրեն դժոխքում»։ Թեհրանում հայտարարել են, որ վճռական պատասխան են տալու, եթե Վաշինգտոնը իրականացնի իր սպառնալիքները։

ԱՄՆ-ի և Իսրայելի ռազմական գործողությունները Իսլամական Հանրապետության դեմ շարունակվում են փետրվարի 28-ից, և այդ ընթացքում կողմերը փոխադարձ հարվածներ են հասցրել։