Իրանում պատերազմի պատճառով շտապ ՀՀ վերադարձածներին մասնակի փոխհատուցման համար 250 մլն դրամ կհատկացվի

PanARMENIAN.Net - Կառավարությունը ֆինանսական աջակցություն կտրամադրի այն քաղաքացիներին, որոնք Իրանում պատերազմի պատճառով Մերձավոր Արևելքում ստեղծված վիճակի հետևանքով չեն կարողացել վերադառնալ կանոնավոր չվերթներով։ Այդ նպատակով պետական բյուջեից կհատկացվի մոտ 250 մլն դրամ:

Աջակցություն կտրամադրվի մոտ 1080 ՀՀ քաղաքացու, որոնք չեն կարողացել վերադառնալ Հայաստան սովորական չվերթներով, հայտնում է Factor.am-ը:

ԱԳ նախարարությունը կազմակերպել է քաղաքացիների վերադարձը՝ ապահովելով թռիչքների թույլտվություններ Օմանից, Լիբանանից և Հնդկաստանից։ ԱՄԷ-ից դեպի Օման կազմակերպվել է անվճար տեղափոխում․ մարտի 4–10-ն ընկած ժամանակահատվածում իրականացված 5 չվերթներով Օման է տեղափոխվել 253 ՀՀ քաղաքացի։ Մարտի 2–12-ն ընկած ժամանակահատվածում Մասկատ–Երևան ուղղությամբ վերադարձել է 550 քաղաքացի, իսկ մարտի 3–16-ն ընկած օրերին Դուբայ–Երևան չվերթներով Հայաստան է ժամանել մոտ 1030 քաղաքացի։

Մարտի 19-ի տվյալներով դիվանագիտական ներկայացուցչություններին դիմել է մոտ 1080 քաղաքացի, որոնց թվում եղել են նաև ուսանողներ Իսրայելից, Կատարից և Քուվեյթից։ Կառավարությունը նախատեսել է փոխհատուցում տրամադրել այն անձանց, որոնց չվերթները չեղարկվել են՝ յուրաքանչյուրի համար մինչև 250 հազար դրամի չափով։

Ծրագիրը կիրառվելու է 2026 թվականի փետրվարի 28-ից մինչև մարտի 25-ն ընկած ժամանակահատվածում գնված ավիատոմսերի համար։ Հայտերը ներկայացվելու են հարթակի միջոցով, իսկ հաստատված գումարները փոխանցվելու են հինգ օրվա ընթացքում։