Դպրոցներում բջջայինների սահմանափակումը նպաստել է աշակերտների ուշադրության բարելավմանը

PanARMENIAN.Net - Երևանի հանրակրթական դպրոցներում բջջային հեռախոսների օգտագործման սահմանափակումը նպաստել է սովորողների ուշադրության բարձրացմանը և դպրոցական կարգապահության ամրապնդմանը։ Այդ մասին Երևանի քաղաքապետարանում կայացած գործակարգավարական նիստի ընթացքում հայտնել է հանրակրթության վարչության պետ Մարգարիտ Խաչատրյանը։

Նա նշել է, որ դա են վկայում իրականացված հարցումների արդյունքները, հայտնում է Արմենպրեսը:

«Հարցվածների 3.4%-ը գտնում է, որ հեռախոսների օգտագործման արգելքը նվազեցրել է կոնֆլիկտները։ Հարցված ուսուցիչների 93.3%-ը, սովորողների 82.7%-ը և ծնողների 96.5%-ը փոփոխությունները դրական են գնահատել»,-ասել է նա։

Քաղաքապետ Տիգրան Ավինյանը բջջային հեռախոսների սահմանափակումը գնահատել է որպես կարևոր և առաջնային քայլ։

«Շատ ուրախալի է, որ արդյունքները դրական են գնահատվում»,-ասել է նա։

Հարցմանը մասնակցել է մոտ 20 հազար մարդ՝ պատահական ընտրության սկզբունքով։ Նշվել է նաև, որ հարցված ուսուցիչների 48.2 %-ը ունեցել է 20 և ավելի տարվա աշխատանքային փորձ։