Տոնոյան․ 27/7 ընտրատեղամասում ըստ հանձնաժողովի արձանագրության ԲՀԿ-ն ստացել է 77 ձայն, ԿԸՀ կայքում նշված է 1

8 հունիսի 2026 - 18:06 AMT

PanARMENIAN.Net - «Բարգավաճ Հայաստան» կուսակցությունը մի շարք ընտրատեղամասերում սկսել է քվեարկության արդյունքների վերահաշվարկի գործընթացը, որի ընթացքում, հայտնաբերվել են անհամապատասխանություններ: Այդ մասին ֆեյսբուքյան իր էջում հայտնել է ԲՀԿ մամուլի խոսնակ Իվետա Տոնոյանը:

Ըստ ներկայացված տվյալների 4 ընտրատեղամասում 120 ձայն քիչ է հաշվարկվել:

«Տարբեր տեղամասերից ստացված տեղեկատվության համադրմամբ արձանագրել ենք հետևյալ պատկերը՝

27/7 ընտրատեղամասում հանձնաժողովի արձանագրության համաձայն՝ «Բարգավաճ Հայաստան» կուսակցությունը ստացել է 77 ձայն, մինչդեռ ԿԸՀ կայքում նշված է 1 ձայն։

12/20 ընտրատեղամասում արձանագրության համաձայն՝ ԲՀԿ-ի օգտին քվեարկել է 26 ընտրող, իսկ ԿԸՀ կայքում նշված է 1 ձայն։

27/26 ընտրատեղամասում արձանագրության համաձայն՝ ԲՀԿ-ն ստացել է 19 ձայն, ԿԸՀ կայքում՝ 3 ձայն։

38/53 ընտրատեղամասում արձանագրության համաձայն՝ ԲՀԿ-ն ստացել է 7 ձայն, ԿԸՀ կայքում՝ 4 ձայն։

Սրանք անհերքելի փաստեր են, յուրաքանչյուր ոք կարող է ԿԸՀ-ի կայքում տեսնել այս անհամապատասխանությունները: Փաստերն աշխատանքային ռեժիմով ներկայացվել են ԿԸՀ, և տվյալները փոփոխման փուլում են: Մենք շարունակում ենք տարբեր ընտրատեղամասերի հետ կապված նորանոր արձանագրումներ կատարել և առաջիկայում հանդես կգանք համապատասխան թարմացումներով»,-ասվում է գրառման մեջ:

Ըստ նախնական տվյալների ՀՀ ԱԺ հունիսի 7-ի ընտրություններում քվեները բաշխվել են հետևյալ կերպ․ «Քաղաքացիական պայմանագիր»՝ 49․825 տոկոս, «Ուժեղ Հայաստան»՝ 23․281 տոկոս, «Հայաստան» դաշինք՝ 9․ 934 տոկոս, «Բարգավաճ Հայաստան»՝ 3․996 տոկոս: Այս թարմացված տվյալներով ԲՀԿ-ն չի հաղթահարում անցողիկ շեմը, որը կուսակցության համար 4 տոկոս է։ Ավելի վաղ ասվել էր, որ կուսակցությունը հավաքել է 4 տոկոս: