Կալաս․ ԵՄ-ն աշխատում է ՀՀ համար խոշոր տնտեսական աջակցության փաթեթի վրա

PanARMENIAN.Net - Եվրամիությունը հայտարարել է ՀՀ համար տնտեսական աջակցության խոշոր փաթեթի մշակման մասին՝ Ռուսաստանի սահմանած առևտրային սահմանափակումների հետևանքները մեղմելու նպատակով։ Այդ մասին հայտարարել է ԵՄ դիվանագիտության ղեկավար Կայա Կալասը Լյուքսեմբուրգում ԵՄ արտաքին գործերի նախարարների հանդիպումից և ՀՀ ԱԳ նախարար Արարատ Միրզոյանի հետ բանակցություններից հետո կայացած մամուլի ասուլիսում։

Նա նշել է, որ անցյալ շաբաթ Հայաստանում անցկացված խորհրդարանական ընտրությունները հստակ ուղերձ են փոխանցել, հայտնում է Factor. am-ը:

«Հայ ժողովուրդը քվեարկել է խաղաղության, ինքնիշխանության ու Եվրոպայի հետ ավելի սերտ կապերի օգտին։ Ռուսաստանի ծանր ճնշումն ու տնտեսական հարկադրանքը չկարողացան ազդել քվեարկության վրա։ Այսօր նախարարները քննարկել են, թե ինչպես կարող ենք հետագայում ամրապնդել Հայաստանի դիմակայունությունը և տնտեսական դիվերսիֆիկացիան։

ԵՄ-ն արդեն աշխատում է խոշոր տնտեսական աջակցության փաթեթի վրա՝ Հայաստանին օգնելու դիմակայել Ռուսաստանի անարդար առևտրային սահմանափակումներին։ Մեր նոր ԵՄ գործընկերության առաքելությունը Հայաստանում շուտով կսկսի աշխատանքը՝ կիբերհարձակումների, անօրինական ֆինանսական հոսքերի և այլ սպառնալիքների դեմ պայքարելու համար»,-հայտարարել է Կալասը։

Լյուքսեմբուրգում անցկացվող ԵՄ երկրների արտաքին գործերի նախարարների խորհրդի նիստում քննարկվելու են նաև Հայաստանին աջակցելու միջոցները: Այդ մասին հայտարարել է ԵՄ արտաքին քաղաքականության և անվտանգության հարցերով բարձր ներկայացուցիչ Կայա Կալասը նիստի մեկնարկից առաջ: Նա հավելել է, որ տեսնում են Ռուսաստանի կողմից աճող ճնշումը: