Կոնգոյում Էբոլայով վարակման դեպքերը գերազանցել են 1000-ը

23 հունիսի 2026 - 16:18 AMT

PanARMENIAN.Net - Կոնգոյի Դեմոկրատական Հանրապետության իշխանությունները հայտնել են, որ երկրում Էբոլա վիրուսով վարակման դեպքերի թիվը հասել է 1048-ի։ Reuters գործակալության փոխանցմամբ՝ հիվանդությունից մահացել է 267 մարդ, ինչը կազմում է վարակվածների ընդհանուր թվի մոտ մեկ քառորդը։

Վարակման հավանական դեպքերի և մահերի գրեթե ամբողջ մասը գրանցվել է երկրի հյուսիսարևելքում գտնվող Իտուրի նահանգում, որը երկար ժամանակ տուժել է զինված հակամարտություններից։ Համաճարակը տարածվել է նաև Կոնգոյի ևս երկու նահանգներում՝ Հյուսիսային Կիվուում և Հարավային Կիվուում, որտեղ շարունակվում է հումանիտար ճգնաժամը։ Այդ պայմաններում իշխանությունների համար դժվարացել է վարակի տարածման դեմ պայքարը, ներառյալ վարակվածների շփումների սահմանափակումը և վարակման շղթաների վերահսկումը, հայտնում է Deutsche Welle-ն:

Համաճարակի սկզբնական փուլում տեղական հիվանդանոցները արագորեն գերծանրաբեռնվել են։ Սակայն Առողջապահության համաշխարհային կազմակերպության և մի շարք հասարակական կազմակերպությունների աջակցությամբ Էբոլայով հիվանդների բուժման կենտրոնների ծանրաբեռնվածությունը հաջողվել է նվազեցնել մինչև 80 տոկոս, հայտնել է AFP գործակալությունը։

Միաժամանակ վիրուսը հայտնաբերվել է նաև հարևան Ուգանդայում։ Սակայն Կամպալայի իշխանությունները հունիսի սկզբին հայտարարել են, որ իրավիճակը «վերահսկողության տակ» է։

Ներկայիս բռնկումը պայմանավորված է Էբոլայի հազվադեպ Bundibugyo շտամով, որն առաջին անգամ հայտնաբերվել է 2007 թվականին։ Այդ շտամի դեմ առայժմ գոյություն չունի ոչ պատվաստանյութ, ոչ էլ հատուկ բուժում։ Դրա մահացության մակարդակը գնահատվել է մոտ 30-50 տոկոս։

Էբոլա վիրուսը փոխանցվում է վարակված անձանց կենսաբանական հեղուկների հետ անմիջական շփման միջոցով, իսկ ինկուբացիոն շրջանը կարող է տևել մինչև երեք շաբաթ։ Վարակվածների մոտ ի հայտ են գալիս տենդ, մկանային ցավեր, լուծ և ներքին արյունազեղումներ, որոնք կարող են հանգեցնել ներքին օրգանների աշխատանքի խանգարման։

Ընթացիկ բռնկումը Դեմոկրատական Կոնգոյի Հանրապետությունում Էբոլայի 17-րդ բռնկումն է 1976 թվականին վիրուսի հայտնաբերումից ի վեր։ Նախորդ անգամ հիվանդությունը տարածվել էր Կասայի նահանգում, որտեղ իրավիճակի կայունացման մասին հայտարարվել է 2025 թվականի դեկտեմբերի 1-ին։ Այդ ժամանակ 64 հիվանդից 45-ը մահացել էր, իսկ 19-ը՝ ապաքինվել։