ՍԴ-ն չի բավարարել ԴՕԿ-ի միջնորդությունը․ Ընտրությունների գործը կմնա միավորված վարույթում

PanARMENIAN.Net - Սահմանադրական դատարանը հունիսի 25-ին աշխատակարգային որոշում է ընդունել հունիսի 7-ի ընտրությունների արդյունքների վիճարկման գործի վերաբերյալ՝ մերժելով ԴՕԿ-ի միջնորդությունը:

«Դեմոկրատիա Օրենք Կարգապահություն» կուսակցության ներկայացուցիչը միջնորդել է դատարանին միավորված վարույթից առանձնացնել և առանձին սահմանադրական վարույթով քննել Սահմանադրական դատարան ներկայացված իրենց դիմումը, հայտնում է Factor.am-ը:

Դատարանը մերժել է նշված միջնորդությունը, քանի որ ինչպես «Դեմոկրատիա Օրենք Կարգապահություն» կուսակցության, այնպես էլ «Ուժեղ Հայաստան» կուսակցությունների դաշինքի, «Միասնության թևեր» կուսակցության, «Բարգավաճ Հայաստան» կուսակցության, «Հանուն Հանրապետության ժողովրդավարության պաշտպանների դաշինք» կուսակցության, «Հայաստան» կուսակցությունների դաշինքի և «Նոր ուժ» ռեֆորմիստական կուսակցության դիմումները վերաբերում են նույն հարցին։

«Ուժեղ Հայաստան» կուսակցությունների դաշինքը պահանջում է անվավեր ճանաչել ընտրությունների արդյունքները և անցկացնել ընտրությունների երկրորդ փուլ։ «Հայաստան» դաշինքը միայն պահանջում է անվավեր ճանաչել ընտրությունների արդյունքները։ «Բարգավաճ Հայաստան» կուսակցության ներկայացուցիչները պնդում են, որ չեն հաղթահարել անցողիկ շեմը, քանի որ երեք ընտրատեղամասերում քվեարկության արդյունքներն անվավեր են ճանաչվել և ԿԸՀ-ն վերաքվեարկություն կազմակերպելու որոշում չի կայացրել։

Դատարանն աշխատակարգային որոշումներով արձանագրել է, որ դատավորներ Վլադիմիր Վարդանյանը և Արտակ Զեյնալյանը կանխակալ վերաբերմունք ունեն որպես կողմ հանդես եկող անձի, նրա ներկայացուցչի, դատավարության այլ մասնակիցների նկատմամբ։ Նրանք չեն մասնակցում գործի քննությանը։