Սպիտակ տունը հայտնել է Թրամփի և Զելենսկու առաջիկա հանդիպման մասին

PanARMENIAN.Net - Սպիտակ տան պաշտոնյան հայտնել է, որ ԱՄՆ նախագահ Դոնալդ Թրամփը և Ուկրաինայի նախագահ Վոլոդիմիր Զելենսկին հանդիպելու են Վաշինգտոնում հուլիսի 28-ին:

Ուկրաինական աղբյուրը հայտնել է, որ Զելենսկին հետաքրքրված է ԱՄՆ մեկնելով, սակայն նրա թիմը սպասում է Սպիտակ տնից Թրամփի ժամանակացույցի պաշտոնական հաստատմանը, գրում է Reuters-ը:

Աղբյուրը նաև հայտնել է, որ ուկրաինացի և ամերիկացի պաշտոնյաները քննարկել են օդային հրադադարի վերաբերյալ առաջարկը, որը նախատեսվում է ներկայացնել ռուս պաշտոնյաներին։ Այն խաղաղության նոր առաջարկների փուլի մաս է կազմել՝ նպատակ ունենալով ավարտել 2022 թվականին Ուկրաինա Ռուսաստանի ներխուժմամբ սկսված պատերազմը։

Նույն աղբյուրի փոխանցմամբ՝ նախկինում Ուկրաինան հրադադարի առաջարկներով դիմել է Ռուսաստանի նախագահ Վլադիմիր Պուտինին, սակայն դրանք մերժվել են։ Այդուհանդերձ, որոշ պաշտոնյաներ կարծել են, որ ուկրաինական անօդաչու թռչող սարքերի և հրթիռային շարունակական հարվածների հետևանքով Ռուսաստանի տնտեսության նկատմամբ ուժեղացած ճնշումը կարող է մեղմել Պուտինի դիրքորոշումը։

Զելենսկին ԱՄՆ բանագնացներ Սթիվ Ուիթքոֆի և Ջարեդ Քուշների հետ քննարկել է Ռուսաստանի հետ խաղաղ բանակցությունների վերսկսման հեռանկարները և հայտնել, որ առաջիկա օրերին ուկրաինացի ու ամերիկացի պաշտոնյաները կարող են հանդիպել Միացյալ Նահանգներում։

Ուկրաինայի պաշտպանության նախարարի պաշտոնակատար Եվգենի Խմարան «Տելեգրամում» գրել է, որ ինքն ու նոր գլխավոր հրամանատար Միխայիլ Դրապատին հուլիսի 24-ին Կիևում հանդիպել են ՆԱՏՕ-ում ԱՄՆ դեսպան Մեթյու Ուիթաքերի հետ և քննարկել մարտադաշտում Ռուսաստանին դիմակայելու տարբեր գործոններ։

«Մենք հրամանատար Դրապատիի հետ ունենք ամուր փոխգործակցություն և պատերազմի վերաբերյալ ընդհանուր տեսլական՝ տեխնոլոգիական գերազանցություն, ասիմետրիկ լուծումներ և հակառակորդին ոչնչացնելու ավելի շատ հնարավորություններ: Մենք մեր գործընկերներին տեղեկացրել ենք ռազմաճակատում տիրող իրավիճակի և Ռուսաստանին արդար խաղաղության պարտադրելու ուղղությամբ Ուկրաինայի քայլերի մասին»,- ասել է Խմարան։

Ավելի վաղ աջակողմյան ակտիվիստ և Թրամփի դաշնակից Լորա Լումերը հարցազրույց է անցկացրել Զելենսկու հետ և հայտնել, որ նա իրեն ասել է՝ հավանաբար հաջորդ շաբաթ Միացյալ Նահանգներում կլինի։ Այցի ընթացքում նախատեսվում է նաև հանդիպում Թրամփի հետ։

Լումերը գրառմամբ հավելել է, որ Զելենսկին իրեն հայտնել է նաև ԱՄՆ սենատոր Լինդսի Գրեհեմի հուղարկավորությանը մասնակցելու մտադրության մասին։ Գրեհեմը մահացել է այս ամսվա սկզբին։ Հանրապետական օրենսդիրի հիշատակի արարողությունը կայանալու է հուլիսի 28-ին Վաշինգտոնում, որտեղ ելույթ է ունենալու Թրամփը, իսկ հուղարկավորությունը հաջորդ օրն անցկացվելու է Գրեհեմի հայրենի Հարավային Կարոլինա նահանգում։

Գրեհեմը եղել է Ուկրաինայի խոշոր աջակիցներից և ռուսական ներխուժումից ի վեր 10 անգամ այցելել է այնտեղ։ Նա հանդես է եկել Ռուսաստանի նկատմամբ պատժամիջոցների և Կիևին ԱՄՆ աջակցության օգտին։