Հայաստանն ու Հունգարիան մտադիր են արագացնել առեւտրատնտեսական համաձայնագրերի ստորագրումը10 հուլիսի 2009 - 15:10 AMT PanARMENIAN.Net - Երկու երկրների ԱԳ նախարարները պայմանավորվել են ակտիվացնել տնտեսական ոլորտի համաձայնագրերի նախապատրաստումը:Հուլիսի 9-ին Հայաստանի արտգործնախարար Էդվարդ Նալբանդյանը կարճատեւ այցով ժամանել է Բուդապեշտ: Հունգարիայի մայրաքաղաք ժամանելուն պես Էդվարդ Նալբանդյանը հանդիպում է ունեցել իր գործընկեր Պետեր Բալաշի հետ: Հայաստանի եւ Հունգարիայի արտգործնախարարների հանդիպման օրակարգում էր ս.թ. նոյեմբերին Հայաստանի Նախագահի Հունգարիա կատարելիք պաշտոնական այցի նախապատրաստական աշխատանքներին, երկկողմ համագործակցությանը, Հայաստան - Եվրոպական միություն հարաբերություններին, տարածաշրջանային եւ միջազգային խնդիրներին վերաբերող հարցերի լայն շրջանակ: Բարձր գնահատելով վերջերս հայ-հունգարական հարաբերությունների զարգացման միտումները` նախարարներ Նալբանդյանն ու Բալաշը նշեցին բարձր մակարդակի փոխայցելությունների եւ քաղաքական երկխոսության ակտիվացման անհրաժեշտությունը` որպես համակողմանի համագործակցության զարգացման երաշխիք: Զրուցակիցներն անդրադարձ կատարեցին առեւտրատնտեսական փոխգործակցության խորացման ուղիներին: Այս ենթատեքստում Հայաստանի արտգործնախարարը կարեւորեց համապատասխան իրավապայմանագրային դաշտի ձեւավորումը, գործարար համաժողովների անցկացումը: Նախարարները պայմանավորվեցին ակտիվացնել տնտեսական ոլորտի համաձայնագրերի նախապատրաստումը` Հայաստանի Հանրապետության Նախագահի Հունգարիա այցելության ընթացքում ստորագրելու նպատակով: Բանակցությունների ընթացքում մանրամասն քննարկվեցին նաեւ Հայաստան - Եվրոպական միություն համագործակցության տարբեր ուղղությունները, Եվրոպական հարեւանության քաղաքականության եւ Արեւելյան գործընկերություն ծրագրի շրջանակներում երկկողմ համագործակցության ակտիվացման նպատակով ձեռնարկվելիք քայլերը: Հայաստանի արտաքին քաղաքական գերատեսչության ղեկավարը Հունգարիայի արտգործնախարարին ներկայացրեց արցախյան հիմնախնդրի հանգուցալուծման բանակցությունների վերջին զարգացումները: Նախարար Նալբանդյանի խնդրանքով Պետեր Բալաշը ներկայացրեց Եվրոպական խորհրդարանի ընտրություններից հետո Եվրոպական միությունում տեղի ունեցող գործընթացները, Եվրոպական հանձնաժողովի ձեւավորման ընթացքը: Հայաստանի եւ Հունգարիայի արտգործնախարարներն անդրադարձան նաեւ հայ-թուրքական հարաբերությունների կարգավորման գործընթացին: Նախարարների հանդիպմանը հետեւեց համատեղ մամուլի ասուլիս, ապա Էդվարդ Նալբանդյանը հարցազրույց տվեց հունգարական հեռուստատեսությանը: Բուդապեշտում Էդվարդ Նալբանդյանը հունգարահայ համայնքի ներկայացուցիչների ուղեկցությամբ ծաղկեպսակ դրեց Հայոց Ցեղասպանության զոհերի հիշատակին Բուդապեշտում կանգնեցված հուշակոթողին: Նույն օրը Էդվարդ Նալբանդյանը մեկնեց Բուխարեստ: Ուշագրավ Էսմայիլին ասել է, որ թռիչքի ժամանակ եղանակը բարենպաստ է եղել, ամպամածություն եղել միայն մեկ հատվածում Այցն աշխատանքային է Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական Կավելացվեն ծախսերը նաև հատուկ նշանակության նախագծերի ֆինանսավորման համար | ԱԱԾ․ Ադրբեջանցի զինծառայողի կողմից ՀՀ սահմանը հնարավոր հատելու դեպքով տվյալներ չկան Այլ տեղեկությունների դեպքում կտրվի լրացուցիչ պարզաբանում ԱԺ խորհուրդը մերժել է ընդդիմության միջնորդությունը Կոնջորյանն ասել է, որ իրենց խմբակցությունը հունիսի 17-ին էլ չի մասնակցելու արտահերթ նիստին Սիմոնյան․ Ո՞վ ասաց՝ երկիրն ավերվում է, հլը գնանք Սարյան փողոց` տեսնենք Նա նաև ասել է, որ Հայաստանի ընդդիմությունը «պասերով» աշխատում է Ռուսաստանի հետ Թենիսիստ Էլինա Ավանեսյանը հանդես կգա ՀՀ դրոշի ներքո «Դեռ պաշտոնական չէ, սպասում ենք, որ քաղաքացիության հարցը լուծվի»,–ասել է նա |