Լեւոն Արոնյանը ՖԻԴԵ-ի Գրան Պրի մրցաշարի փուլերի վաղաժամ հաղթողն է

PanARMENIAN.Net - Հայ գորսմայստեր Լեւոն Արոնյանը Ջերմուկում ընթացող ՖԻԴԵ-ի Գրան Պրի մրցաշարի հինգերորդ փուլում, Բորիս Գելֆանդի հետ կիսելով 2-3-րդ տեղերը, ՖԻԴԵ-ի Գրան Պրի մրցաշարի ընդհանուր ստուգարքում 500 միավորով առաջին տեղը գրավեց եւ անհասանելի դարձավ մյուս շախմատիստների, մասնավորապես մրցաշարի նախկին առաջնորդ ադրբեջանցի գրոսմայստեր Թեյմուր Ռաջաբովի համար:



2-3-րդ տեղերը կիսում են Ռաջաբովն ու ռուս շախմատիստ Ալեքսանդր Գրիշչուկը` հավաքելով 363,33 միավոր: Ի տարբերություն Գրիշչուկի, որը մասնակցել էր բոլոր չորս պարտադիր փուլերին, Ռաջաբովի հաշվին առայժմ երեքն են:



Արոնյանը նույնպես մասնակցել է երեք փուլի: Նախորդ երկու փուլում հայ գրոսմայստերն ուժեղագույնն է եղել` հաղթանակ տանելով սկզբում Սոչիում երկորդ փուլում, այնուհետեւ Նալչիկում 4-րդ փուլում:



«Գրան Պրիի»կանոնադրության համաձայն, յուրաքանչյուր գրոսմայստեր պետք է մասնակցի վեց մրցաշարից չորսին, իսկ հաշվարկվում են երեք լավագույն ցուցանիշները:



Իսկ Արոնյանը մրցաշարում երկու հաղթանակ տարած միակ մասնակիցն է, այնուհետեւ Ջերմուկում նրա հաջող մասնակցությունը փակեց «Գրան Պրիի» հաղթողի հարցը:



ՖԻԴԵ-ի Գրան Պրի մրցաշարերը ընտրական մրցություններ են համաշխարհային առաջնության համար մղվող պայքարում: Ընդհանուրր ստուգարքում առաջին երկու տեղը գրաված մասնակիցներն իրավունք են ստանում ապագայում մասնակցելու հավակնորդների մրցաշարին: Հավակնորդների մրցաշարի հաղթողը, իր հերթին, 2011 թվականին շախմատի թագի համար կպայքարի աշխարհի գործող չեմպիոնի հետ:



ՖԻԴԵ-ի Գրան Պրի մրցաշարի ընդհանուր ստուգարքը.



1. Լեւոն Արոնյան (Հայաստան)-500 միավոր

2. Թեյմուր Ռաջաբով (Ադրբեջան)-363,33 (3)

3. Ալեքսանդր Գրիշչուկ (Ռուսաստան)- 363,33 (4)

4. Վան Յուէ (Չինաստան)- 353,33 (3)

5. Վուգար Հաշիմով (Ադրբեջան) - 328,33 (3)

6.Պետեր Լեկո (Հունգարիա) - 320 (3)

7. Դմիտրի Յակովենկո (Ռուսաստան)- 278,33 (3)

8. Վասիլի Իվանչուկ (Ուկրաինա) -265 (3)

9. Բորիս Գելֆանդ (Իսրայել)- 255 (3)

10. Շախրիյար Մամեդյարով (Ադրբեջան) - 240 (3)

11. Էտյեն Բակրո (Ֆրանսիա)- 240 (4)

12. Գատա Կամսկի (ԱՄՆ) - 235 (4)

13. Պյոտր Սվիդլեր (Ռուսաստան) -230 (3)

14. Սերգեյ Կարյակին (Ուկրաինա)- 230 (4)

15. Եվգենի Ալեքսեեւ (Ռուսաստան)- 220 (3)

16. Ռուստամ Կասիմջանով (Ուզբեկստան)-200 (3)

17. Վլադիմիր Հակոբյան (Հայաստան)- 190 (3):