Գեորգիս Դիկեոուլակոս. «Ատինայկոսը» հաղթեց իր փորձի շնորհիվ

PanARMENIAN.Net - Հունական թիմի գլխավոր մարզիչ Գեորգիս Դիկեոուլակոսը ուրախ էր հաղթանակի համար եւ շնորհակալություն հայտնեց Երեւանի թիմին ջերմ հյուրընկալության համար: «Երեւանում մեզ շատ լավ եւ ջերմ ընդունեցին: Մեզ զարմացրեց դահլիճի պահվածքը խաղի ժամանակ, «Հատիսը» հսկայական աջակցություն ստացավ իր երկրպագուներից»,-ասել է Դիկեոուլակոսը:



Մարզիչը գտնում է, որ «Հատիսը» փոխել է խաղի որակը իրենց հետ առաջին խաղի համեմատ, որը տեղի ունեցավ նոյեմբերի 12-ին Հունաստանում, եւ որտեղ «Հատիսը» պարտվեց 105:54 հաշվով:



«Չնայած «Հատիսի» առավելությանը առաջին քառորդում, իմ սաները կարողացան հավաքվել եւ դա եղավ մեր հաղթանակի գրավականը: Ես շնորհավորում եմ «Հատիսի» մարզչին եւ բասկետբոլիստուհիներին լավ խաղի համար»,-ասել է «Ատինայկոսի» գլխավոր մարզիչը:



Նա գտնում է, որ «Հատիսը» զիջում էր իր թիմին միայն առանձին խաղային դիրքերում եւ իրենք հաղթեցին փորձառության շնորհիվ: «Կարծում եմ, որ F խմբից խմբային փուլը կհաղթահարենք մենք, «Հատիսն» ու «Բեշիկթաշը», իմ գլխավոր նպատակն է, որ իմ սաները որակական աճ ունենան»,-ասել է Դիկեոուլակոսը:



Դեկտեմբերի 3-ին 2008-2009թթ. Եվրոպայի գավաթի մրցաշարում «Ատինայկոսը» հասավ կիսաեզրափակիչ, այս սեզոնում, ըստ մարզչի, նրանք ցանկանում են գերազանցել նախկին նվաճումը: