Եթե Ադրբեջանն իսկապես պատրաստ լիներ պատերազմի, այն վաղուց արդեն սկսված կլիներ

12 փետրվարի 2010 - 18:14 AMT

PanARMENIAN.Net -
Եթե Ադրբեջանն իսկապես պատրաստ լիներ պատերազմի, ապա ամեն օր նույն երգը չէր երգի, այլ պարզապես կսկսեր այդ պատերազմը: Այդ մասին այսօր Երեւանում կայացած մամլո ասուլիսում հայտնեց Հայաստանի Հանրապետական Կուսակցության խորհրդարանական խմբակցության ղեկավար Գալուստ Սահակյանը: Նրա խոսքով, այդ հարցում կա ԵԱՀԿ Մինսկի խմբի համանախագահների հստակ դիրքորոշումը, որոնք ասել են, որ պատերազմի դեպքում Ադրբեջանի տարածքային ամբողջականության հարցի քննարկումը վերջնականապես կմերժվի, եւ կքննարկվի միայն ԼՂՀ ինքնորոշման հարցը:

Դրա հետ մեկտեղ Գալուստ Սահակյանը նշեց, որ Հայաստանը բազմիցս հայտարարել է, որ իր համար ղարաբաղյան հակամարտության կարգավորման գործընթացում առաջնահերթը ԼՂՀ կարգավիճակն է: «Սկզբում պետք է վճռել Ղարաբաղի կարգավիճակի հարցը եւ միայն հետո անդրադառնալ մյուս հարցերի լուծմանը»,- նշեց Սահակյանը` ավելացնելով, որ Հայաստանն ապահովում է ԼՂՀ անվտանգությունը, իսկ մնացածն արդեն պետք է որոշի Ղարաբաղի ժողովուրդը` արդյոք նա ցանկանում է միանալ Հայաստանին, թե ոչ:

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: