Բրիտանիայի խորհրդարանի Համայնքների պալատի անդամների մեծամասնությունը ճանաչել է Հայոց ցեղասպանությունը

16 փետրվարի 2010 - 15:16 AMT

PanARMENIAN.Net -
Մեծ Բրիտանիայի Համայնքների պալատը դատապարտում է Հոլոքոսթի, ինչպես նաեւ 1915թ. Թուրքիայում իրագործված Հայոց ցեղասպանության եւ ասորիների ցեղասպանության ժխտումը: Ինչպես ասվում է «Նոր սերունդ» հայ մշակութային ասոցիացիայի PanARMENIAN.Net ի ստացած հաղորդագրության մեջ, Համայնքների պալատի ձայնի իրավունք ունեցող 495 անդամներից Ցեղասպանության ճանաչման առաջարկի օգտին են քվեարկել 254 խորհրդարանականներ:

Համայնքների պալատի թիվ 287 առաջարկության մեջ, մասնավորապես, ասվում է. «Համայնքների պալատը դատապարտում է Հոլոքոսթի, ինչպես նաեւ 1915թ. Թուրքիայում իրագործված Հայոց ցեղասպանության եւ ասորիների ցեղասպանության ժխտումը: Համայնքների պալատը դատապարտում է նման իրադարձությունների հանգեցրած քաղաքականությունը: Մենք կոչ ենք անում խորհրդարանի պատգամավորներին հարգել Հոլոքոսթի, 1915թ. Ցեղասպանության հիշատակի օրը` այդպիսով իսկ ապացուցելով, որ այդ զոհերն ու վայրագ իրադարձություններն երբեք չեն մոռացվի»:

«Նոր սերունդ» ասոցիացիայի ներկայացուցիչ Էյլիան Ուիլյամսը հայտարարել է, որ Մեծ Բրիտանիան եւ այլ եվրոպական երկրներ պետք է ճանաչեն, որ Թուրքիայի այժմյան սահմանները Հայոց ցեղասպանության եւ ասորիների ցեղասպանության հետեւանք են: «Թուրքիային ԵՄ թողնելուց առաջ, հարկավոր է ուշադրություն դարձնել այն փաստի վրա, որ հայկական եկեղեցիներն ու հողերը առգրավվել են թուրքական կառավարության կողմից 1923թ.` «Առանց տնօրինության մնացած գույքի մասին օրենքով»,-ասել է ասոցիացիայի ներկայացուցիչը:

Ճանաչելով Հայոց ցեղասպանությունը` բրիտանացի խորհրդարանականները հետեւեցին Ուելսի, Շոտլանդիայի եւ Հյուսիսային Իռլանդիայի օրինակին:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: