Արձանագրությունների վավերացումն ու իրագործումն անհրաժեշտ պայման է Հայաստանի պոտենցիալի բացահայտման համար

PanARMENIAN.Net -
Եթե հայ-թուրքական հարաբերությունների կարգավորման գործընթացը, որը նախաձեռնվել է Հայաստանի կողմից եւ օժանդակվում է այնպիսի խաղացողների կողմից, ինչպիսիք են Ռուսաստանը, ԱՄՆ-ն ու Եվրամիությունը, հաջողությամբ է պսակվելու, ապա դա լուրջ կերպով կփոխի եւ կբարձրացնի Հայաստանի ու Թուրքիայի ռազմավարական նշանակությունը: Այդ մասին PanARMENIAN.Net ին հայտնեց «Հայաստանի եվրոպական բարեկամներ» (EuFoA) կազմակերպության փորձագետ Սարգիս Գազարյանը:



Նրա խոսքով, Հայաստանի նորագույն պատմության մեջ քաղաքական եւ տնտեսության ծրագրման ռազմավարական իմաստով կարեւոր լուծումները ձեւավորվել են հետեւյալ աշխարհաքաղաքական պայմաններում` փակ սահման, անօրինական եւ միակողմանի շրջափակում:



«Արձանագրությունների վավերացումն ու իրագործումն անհրաժեշտ պայման է Հայաստանի եւ ողջ Հարավային Կովկասի պոտենցիալի բացահայտման համար: Այդ գործընթացի հաջողությունը կարող է վերջ դնել ազգայնականությանը տարածաշրջանում»,- ասաց Գազարյանը: Նա նշեց, որ տարածաշրջանում աննախադեպ բարեփոխումներ են տեղի ունենում, եւ այսօր Հայաստանը ներդրում է կատարում մի քանի տարի առաջ անհնար թվացող գործում:



«Այժմ թուրքական կողմի հերթն է ապացուցելու իր հավատարմությունն այդ գործընթացին` առանց նախապայմանների եւ վերապահումների վավերացնելով Արձանագրությունները: Վերջիվերջո, խոսքը գնում է Թուրքիայի ապահովության մասին` որպես միջազգային հանրության անդամ եւ ԵՄ-ին անդամակցելու թեկնածու»,- ասաց փորձագետը: