ՀՀ ԱԳՆ. Հայ-թուրքական հանձնաժողովի ստեղծումը հնարավոր է միայն Արձանագրությունների վավերացումից հետո

PanARMENIAN.Net - Հայաստանի եւ Թուրքիայի միջեւ պատմաբանների միջկառավարական հանձնաժողովի ստեղծումը նախատեսված է Ցյուրիխում ստորագրված հարաբերությունների կարգավորման մասին Արձանագրություններով` միայն երկու երկրների խորհրդարանների կողմից դրանք վավերացնելուց հետո: Այդ մասին PanARMENIAN.Net -ին է հայտարարել ՀՀ ԱԳՆ մամլո քարտուղար Տիգրան Բալայանը` մեկնաբանելով ԱՄՆ պետքարտուղար Հիլարի Քլինթոնի հայտարարությունն այն մասին, որ սկսվել է հայ-թուրքական պատմական հանձնաժողովի ձեւավորումը:



Ըստ Տիգրան Բալայանի, միայն Արձանագրությունների վավերացումից հետո կարվեն այն քայլերը, որոնք նախատեսում են հարաբերությունների կարգավորում եւ հայ-թուրքական սահմանի բացում:



Հայաստանի եւ Թուրքիայի միջեւ պատմաբանների միջկառավարական հանձնաժողովը ձեւավորման փուլում է: Այդ մասին Ռուսաստանի առաջին հեռուստաալիքի «Պոզներ» ծրագրի եթերում հայտարարել է ԱՄՆ պետքարտուղար Հիլարի Քլինթոնը:



Հայ-թուրքական հարաբերությունների կարգավորման մասին Արձանագրությունները ստորագրվել են 2009թ. հոկտեմբերի 10-ին Ցյուրիխում: Արձանագրությունները ստորագրել են Հայաստանի եւ Թուրքիայի ԱԳ նախարարներ Էդվարդ Նալբանդյանը եւ Ահմեդ Դավութօղլուն` Ֆրանսիայի, ԱՄՆ-ի, ՌԴ-ի եւ Շվեյցարիայի ԱԳՆ ղեկավարների ներկայությամբ: Շվեյցարիան որպես միջնորդ է հանդես գալիս հայ-թուրքական բանակցություններում 2007թ. ի վեր: Ըստ փաստաթղթերի, երկրների միջեւ պետք է հաստատվեն դիվանագիտական հարաբերություններ եւ պետք է բացվի 1993թ. ի վեր փակ հայ-թուրքական սահմանը: Հունվարի 12-ին Հայաստանի Սահմանադրական դատարանն Արձանագրությունները Հայաստանի Սահմանադրությանը համապատասխան ճանաչեց: ՍԴ որոշման մեջ Արձանագրությունների վերաբերյալ ոչ մի նախապայմաններ չկան, քանի որ դա հակասում է վճռի կայացման սահմանված կանոնին: ՍԴ որոշման համաձայն Հայ-թուրքական արձանագրությունները համապատասխանում են ՀՀ Սահմանադրությանն ու Հայաստանի Անկախության մասին հռչակագրին: