Կանադայում տեղի են ունենալու Հայոց ցեղասպանության 95-ամյա տարելիցին նվիրված միջոցառումներ

1 ապրիլի 2010 - 12:35 AMT

PanARMENIAN.Net - Կանադայում տեղի են ունենալու Հայոց ցեղասպանության 95-ամյա տարելիցին նվիրված միջոցառումներ: Ինչպես ասվում է Կանադայի Հայ դատի հանձնախմբի (ANCC) կողմից Pan.ARMENIAN.Net ուղարկած հաղորդագրության մեջ, ապրիլի 14-ին Օտտավայում երկրի խորհրդարանի շենքում տեղի է ունենալու պատգամավորների եւ սենատորների ընդունելություն, իսկ «Թեքեյան» մշակութային կենտրոնում բացվելու է «Հայոց ցեղասպանության ժխտումը» ցուցահանդեսը:

Ապրիլի 15-ին Հայկական բարեգործական ընդհանուր միության (AGBU) «Ալեք Մանուկյան» կենտրոնում տեղի է ունենալու այն հեղինակների գրքերի ցուցահանդես-վաճառքը, որոնք դարձել են Օսմանյան կայսրությունում Հայոց ցեղասպանության զոհերը: Ապրիլի 18-ին Մոնրեալում նախատեսված է «Ապրիլի 11-ի հուշարձանը» գրքի շնորհանդեսը, իսկ ապրիլի 21-ին քաղաքի Հոլոքոսթի թանգարանում կայանալու է գերմանացի բանաստեղծ, գրող Արմինե Վեգների լուսանկարների ցուցահանդեսի բացումը, որոնք արվել են Հայոց ցեղասպանության ժամանակ:

Կանադայի հայկական համայնքի ներկայացուցիչներն ապրիլի 24-ին ցույց են կազմակերպելու Կանադայի խորհրդարանի շենքի առաջ, իսկ հետո բողոքի ակցիա են անցկացնելու Օտտավայում Թուրքիայի դեսպանատան առաջ: Բացի դրանից, ապրիլի 24-ին Կանադայի եկեղեցիներում պատարագ կմատուցվի Հայոց ցեղասպանության զոհերի հիշատակին:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: