Հայաստանը գիտի Ադրբեջանի թույլ կողմերը

8 ապրիլի 2010 - 15:53 AMT

PanARMENIAN.Net - Տարածքային խնդիրներն երկրների միջև հազվադեպ են խաղաղ ճանապարհով լուծվում”: Այդ մասին Երեւանում հայտարարել է Արկադի Տեր-Թադևոսյանը (Կոմանդոս): Նրա խոսքերով, Հայաստանի և բուն Ղարաբաղի անվտանգությունն ապահովում են ՀԱՊԿ հավաքական ուժերը, ելնելով դրանից զինված հարձակումը Հայաստանի վրա Ադրբեջանի և Թուրքիայի կողմից քիչ հավանական է: Սակայն Արկադի Տեր-Թադևոսյանը չի բացառել Ադրբեջանի կողմից սադրանքի հավանականությունը ԼՂՀ ազատագրված տարածքների շրջանում: “Պետք է օբյեկտիվ գնահատել իրական իրավիճակը: Մենք պետք է իրատես լինենք: Իսկ իրականությունը հետևյալն է`պատերազմի հավանականությունը մեծ է և հենց այդ պատճատով են այժմ միջնորդներն ու կողմերը շեշտը դնում ուժի չկիրառման մասին համաձայնագրի ստորագրման վրա”,-նշել է ռազմական մասնագետը: Ըստ նրա, այսօր իրավիճակը բանակցային գործընթացում փակուղային է և չնայած ԵԱՀԿ ՄԽ հայտարարություններին առաջընթացի մասին, առաջընթաց խնդրի կարգավորման հարցում չկա:

Ինչպես ընդգծել է գեներալ-մայորը, եթե Ղարաբաղում պատերազմ սկսվի, այն չի ընթանա նույն մեթոդներով ու տեխնիկայով, ինչ նախկինում: Ըստ նրա, դա պատերազմ կլինի նոր սերնդի տեխնիկայի կիրառմամբ: Ա.Տեր-Թադևոսյանը հայտարարել է, որ Հայաստանը գիտի Ադրբեջանի թույլ կողմերը և անհրաժեշտության դեպքում, կարող է հարված հասցնել նրա ռազմավարական օբյեկտներին` նավթամուղին, էլեկտրակայաններին, հիդրոէլեկտրակայաններին:

Արկադի Տեր-Թադևոսյանը(Կոմանդոս)

Արկադի Տեր-Թադևոսյանը(Կոմանդոս) ծառայել է Աֆղանստանում, Չեխոսլովակիայում, Գերմանիայում, Բելառուսում և 1987թ-ից Հայաստանում:

1988թ. ակտիվ կերպով մասնակցել է աշխարհազորայինների ուսուցմանը, իսկ 1990թ-ից դարձել է “Սասունցի Դավիթ” կամավորական ջոկատի անդամ: 1991թ. նշանակվել է պաշտպանության կոմիտեի արտաբանակային պատրաստության բաժնի ղեկավար, որը Հայաստանի կառավարությանը կից առաջին պետական գերատեսչությունն էր:

1992թ. մշակել և իրագործել է Շուշիի ազատագրման փայլուն օպերացիան 1992թ. մայիսի 8-9-ը: 1992թ մայիսի 25-ին Տեր-Թադևոսյանին շնորհվել է գեներալ-մայորի կոչում:

Պարգևատևվել է առաջին աստիճանի “Մարտական խաչով”: 2009թ. Շուշիի ազատագրման օրվա կապակցությամբ ԼՂՀ նախագահ Բակո Սահակյանի հրամանով Արկադի Տեր-Թադևոսյանին շնորհվել է Լեռնային Ղարաբաղի Հանրապետության “Արցախի հերոս” բարձրագույն պարգևը Հայրենիքին մատուցած ծառայությունների համար: