Մարգարիտա Հովակիմյան. Իմ երազանքն աշխարհի լողի չեմպիոնի տիտղոսը նվաճելն է

PanARMENIAN.Net - Ապրիլի 21-ին Հայաստանի Հաշմանդամային սպորտի ազգային ֆեդերացիայի տնօրեն Սամվել Ռոստոմյանը, մամլո քարտուղար Վարդուհի Արամյանը և սահմանափակ հնարավորություններով մարդկանց շարքում Ռուսաստանի լողի առաջնության արծաթե մեդալակիր Մարգարիտա Հովակիմյանը հանդիպել են լրագրողների հետ:

Հովակիմյանը Ռուսաստանի առաջնությունում հանդես է եկել 4 մարզաձևում` նվաճելով 2 արծաթե մեդալ “բրաս” և “ազատ լող” ոճերում` լրացնելով Ռուսաստանի լողի առաջին նորման:

“Ռուսաստանի առաջնությանը մասնակցում էին շատ փորձառու մարզիկներ, պարաօլիմպիական չեմպիոններ և Եվրոպայի ու աշխարհի ռեկորդակիրներ Ռուսաստանից, Ղազախստանից և Թայլանդից,- ասել է Վարդուհի Արամյանը,- Մեր մարզուհուն չի բավականացրել 100-երորդական վայրկյան աշխարհի առաջնությունում ելույթ ունենալու իրավունք նվաճելու համար”:

15-ամյա լողորդուհին սպորտով զբաղվում է 5 տարեկանից և տարբեր ձեռքբերումներ ունի. “Առաջին անգամ ես մասնակցել եմ այսպիսի խոշոր մրցաշարի և կարծում եմ, լավ եմ հանդես եկել: Իմ երազանքն է նվաճել աշխարհի առաջնության ուղեգիր”,- ասել է Հովակիմյանը PanARMENIAN.Net ի թղթակցի հետ զրույցում: