Էստոնիայի հայ համայնքը մի շարք միջոցառումներ կանցկացնի` նվիրված Հայոց ցեղասպանության 95-ամյակին

22 ապրիլի 2010 - 14:14 AMT

PanARMENIAN.Net - Էստոնիայի հայ համայնքը մի շարք միջոցառումներ կանցկացնի` նվիրված Հայոց ցեղասպանության 95-ամյակին: Միջոցառումների շարքը կմեկնարկի “Ես հիշում եմ” ակցիայից, որը տեղի կունենա ապրիլի 24-ին Տալլինի հայկական եկեղեցու բակում: Ներկաները մոմեր կվառեն և մեկ րոպե լռությամբ կհարգեն զոհվածների հիշատակը, այնուհետև ծաղիկներ կդնեն խաչքարի մոտ: Բացի այդ, ապրիլի 24-ին “Արտիս” կինոթատրոնում տեղի կունենա իտալական “Արտույտների ագարակը” ֆիլմի պրեմիերան:

Տալլինի Հայ ազգային ընկերակցությունը շվեդական եկեղեցում կազմակերպում է հուշ-համերգ:

Մայիսի 2-ին Sportland-ում տեղի կուենա “Արարատ-ՏՏՈւ” և “Արտ Ինտերնատինոլ” ֆուտբոլային ակումբների խաղը: “Արտ Ինտերնատինոլի” անդամներ են Էստոնիայում հայտնի մարդիկ` դերասաններ, մարզիկներ, լրագրողներ, գործարարներ: Խաղը նվիրվում է Հայոց ցեղասպանության 95-ամյակին` երկու թիմերի անդամները դաշտ դուրս կգան սև թևկապերով:

Էստոնիայի Հայ երիտասարդների միությունը մտադիր է բացել www.genotsiid.ee ինտերնետ-ռեսուրսը էստոներեն, ռուսերեն և հայերեն լեզուներով, որն ամբողջությամբ նվիրված կլինի Հայոց ցեղասպանությանը: Դա ամենամեծ ռեսուրսը կլինի այդ թեմայով էստոներեն լեզվով, հաղորդում է miasin.ru-ն:

Հղումներ թեմայով.

Miasin.ru - 24-ого апреля Армянская Диаспора Эстонии дает старт циклу мероприятий, посвященных 95-ой годовщине Геноцида армян в Османской Империи

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: