"Վերադարձիր հայրենիք" ակցիայի շրջանակներում Դուբայից մոտ 35 ընտանիքներ տեղափոխվել են ՀՀ

25 ապրիլի 2010 - 09:23 AMT

PanARMENIAN.Net - Մենք որոշեցինք հայրենիք վերադառնալ, որպեսզի այլևս Սփյուռք չլինի, և համատեղ ջանքերով պայքարենք հանուն Ցեղասպանության ճանաչման: Մենք պետք է Թուրքիայից պահանջենք Ցեղասպանության մեկուկես միլիոն զոհերի արյունը",- PanARMENIAN.Net ի թղթակցի հետ զրույցում հայտնեց Դուբայից ընդմիշտ Հայաստան տեղափոխված Աբրահամ Ապենյանը:

Ապենյանը նկատեց, որ արդեն մեկ տարի է, ինչ ինքն իր ընտանիքի հետ Հայաստան է տեղափոխվել: "Մեր "Վերադարձիր հայրենիք" ակցիայի շրջանակներում մեկուկես տարվա ընթացքում Դուբայից մոտ 35 ընտանիքներ են տեղափոխվել ՀՀ",- նկատեց նա` ավելացնելով, որ այս տարվա հունիսի վերջին կվերադառնան ևս 15 հայ ընտանիքներ: Ապենյանը Սփյուռքի բոլոր հայերին նույնպես կոչ արեց հայրենի հող վերադառնալ, որպեսզի հայերը մեկ հայրենիք ունենան:

Հայրենադարձը հաղորդեց նաև, որ ապրիլի 24-ին Դուբայում միշտ Հայոց ցեղասպանության զոհերի հիշատակին նվիրված միջոցառումներ են անցկացվում:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: