Մայիսի 18-ին հայ համայնքը բողոքի ցույց կանցկացնի Ֆրանսիայի Սենատի շենքի դիմաց

15 մայիսի 2010 - 18:12 AMT

PanARMENIAN.Net - Ֆրանսիայի հայերը մայիսի 18-ին բողոքի ցույց կանցկացնեն Ֆրանսիայի Սենատի շենքի դիմաց և Ֆրանսիայի սենատորներից կպահանջեն հաստատել Հայոց ցեղասպանության ժխտման համար քրեական պատասխանատվություն նախատեսող օրինագիծը: Ինչպես PanARMENIAN.Net ի թղթակցին հաղորդեց Ֆրանսիայի հայ համայնքի ներկայացուցիչ Ասբեդ Հարամանդայանը, ակցիայի նախաձեռնողը Ֆրանսիայի Հայկական կազմակերպությունների խորհուրդն է (CCAF): «Ցույցի մասնակիցները Սենատից կպահանջեն ընդունել XX դարի առաջին Ցեղասպանության ժխտման համար քրեական պատասխանատվություն նախատեսող օրինագիծը»,- ասել է Հարամանդայանը:

2006 թվականի հոկտեմբերի 12-ին Ֆրանսիայի Ազգային ժողովն ընդունեց Հայոց ցեղասպանության ժխտման համար քրեական պատասխանատվություն նախատեսող օրինագիծը: Որպեսզի օրինագիծն օրենքի ուժ ստանա, այն պետք է հաստատեն Սենատն ու ստորագրի նախագահը: Օրինագիծը 1 տարվա ազատազրկում կամ 45 հազար եվրոյի չափով տուգանք է նախատեսում:

Ֆրանսիայի ուսումնական հաստատություններում բազմիցս բախվում են Հայոց ցեղասպանության հերքման խնդրի հետ: Օրինակ, 2009 թվականին Նանսի քաղաքի վարժարաններից մեկում Հայոց ցեղասպանության քննարկման ժամանակ ազգությամբ թուրք աշակերտ Մուսթաֆան հայտարարել է, որ Ցեղասպանություն չի եղել: Ուսուցիչը դասարանից դուրս է հրավիրել Մուսթաֆային: Մեկ այլ դեպքում պատմության դասին թուրք դեռահասը, չկարողանալով պատասխան տալ այդ հարցին և չկարողանալով տիրապետել իրեն, վրդովված հայտարարել է. «Հայերին Ցեղասպանության չեն ենթարկել, իսկ եթե նույնիսկ արել են, նշանակում է նրանք արժանի էին դրան»:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: