Ազգային անվտանգության խորհրդի քարտուղար Արթուր Բաղդասարյանն ընդունել է Գունար Վիգանդին և Ռաուլ դե Լյուցենբերգերին

PanARMENIAN.Net - Հայաստանի Ազգային անվտանգության խորհրդի քարտուղար Արթուր Բաղդասարյանը հուլիսի 19-ին ընդունել է Հայաստան-Եվրամիություն ասոցացման համաձայնագրի կնքման շուրջ բանակցող թիմի ղեկավար, Եվրոպական հանձնաժողովի արտաքին հարաբերությունների գլխավոր տնօրինության Արևելյան Եվրոպայի, Հարավային Կովկասի և Կենտրոնական Ասիայի երկրների հարցերով տնօրեն Գունար Վիգանդին և Հայաստանում եվրոպական հանձնաժողովի պատվիրակության ղեկավար, դեսպան Ռաուլ դե Լյուցենբերգերին:

Քննարկվել են Հայաստանի և Եվրամիության միջև Ասոցացման համաձայնագրի կնքման բանակցություններին առնչվող հարցեր: Ընդգծելով, որ Հայաստանը ձգտում է խորացնել բազմակողմ համագործակցությունը Եվրամիության հետ, Արթուր Բաղդասարյանը կարևորել է արդարության, ազատության և անվտանգության հարցերով ենթակոմիտեի ստեղծումը:

Որպես տնտեսական համագործակցության զարգացման առաջնային պայման` կողմերն Ասոցացման համաձայնագրի հետ մեկտեղ առանձնացրել են նաև խոր և համապարփակ ազատ առևտրի համաձայնագրի կնքման անհրաժեշտությունը: Գունար Վիգանդը ողջունել է մուտքի արտոնագրերի տրամադրման հարցում արձանագրված առաջընթացը:

Զրուցակիցներն անդրադարձել են Հայաստանում ներդրումային միջավայրի բարելավմանն ուղղված գործողությունների իրագործման անհրաժեշտությանը: Կողմերը քննարկել են նաև Ասոցացման համաձայնագրի դրույթների իրականացման համար բարձր որակավորում ունեցող կադրերի նախապատրաստման հարցը, հաղորդում է ՀՀ ԱԱԽ քարտուղարի մամլո գրասենյակը: