ՌԱՀՀԿ-ն աշխատանքներն այսօրվանից կղեկավարի փորձագետ Մանվել Սարգսյանը

PanARMENIAN.Net - Ռազմավարական եւ ազգային հետազոտությունների հայկական կենտրոնի (ՌԱՀՀԿ) վերլուծական-փորձագիտական աշխատանքներն այսօրվանից կղեկավարի նույն Կենտրոնի երկար տարիների ավագ փորձագետ Մանվել Սարգսյանը` այդ պաշտոնում փոխարինելով Ռիչարդ Կիրակոսյանին:

«Իհարկե, հրաշքի պետք չէ սպասել, բայց կան հետաքրքիր հղացումներ, ծրագրեր, ներքին եւ արտաքին հարթակների արդիական թեմաներ, որոնք սպասում են նորովի ու խորքային մեկնությունների»,- անձնակազմի հետ անդրանիկ հանդիպմանը նշեց Սարգսյանը:

«Առանձին մենագրությունների, հավաքական հետազոտությունների, ավանդական սեմինար-քննարկումների միջոցով մենք միասին ենք կատարելու այդ աշխատանքը: Աներկբա է, որ Կենտրոնը թարմ գաղափարների եւ լիարյուն բովանդակության կարիք ունի: Ուրախ ենք այս առիթով ողջունել մեր անձնակազմի շարքերը համալրող քաղաքագետ Էդգար Վարդանյանին եւ պատմաբան Սարո Սարոյանին»,- հավելեց հետազոտությունների նորանշանակ ղեկավարը:

ՌԱՀՀԿ-ը շնորհակալություն է հայտնել Ռիչարդ Կիրակոսյանին` նրա ծառայության համար:

Ռազմավարական եւ ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը: Հետեւելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձեւավորող եւ միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության եւ ազգի համար վճռորոշ՝ ներքին ու արտաքին քաղաքականությունների կիրառական հետազոտությանը: