Հայաստանի և Ռուսաստանի էներգետիկները համատեղ նախագծեր են քննարկում Երևանում

PanARMENIAN.Net - Ապրիլի 19-ին Երևանում տեղի ունեցավ «Համատեղ էներգետիկ ծրագրերը` որպես երկկողմ միջտարածաշրջանային կապերի ամրապնդման գործոն» խորագրով կլոր սեղան, որն ընթանում է «Հայ-ռուսական հարաբերությունների տնտեսական նոր հեռանկարները» խորագրով հայ-ռուսական միջտարածաշրջանային առաջին ֆորումի շրջանակներում:

Ինչպես նշել է հայկական կողմից կլոր սեղանի համակարգող, Հայաստանի էներգետիկայի և բնական պաշարների նախարարի տեղակալ Արեգ Գալստյանը, այս կլոր սեղանի նպատակը էներգետիկ ոլորտում հնարավոր համատեղ նախագծերի քննարկումն է: Քննարկումների ավարտին հայկական և ռուսական ընկերությունների միջև արտադրվող ապրանքի մատակարարման մասին երկու պայմանագիր կստորագրվի:

Ռուսական կողմից կլոր սեղանի համակարգող, ՌԴ էներգետիկայի նախարարի տեղակալ, պետքարտուղար Յուրի Սենտյուրինն ընդգծել է, որ «այսօրվա ընդլայնված նիստում Հայաստանի նախագահ Սերժ Սարգսյանի մտքերն այն մասին, որ էներգետիկան առանցքային տեղ է զբաղեցնում Հայաստանի և Ռուսաստանի ռազմավարական գործընկերությունում», կամրապնդվեն կոնկրետ թվերով և նախագծերով, որոնք կիրականացվեն հայկական հողի վրա:

Հայկական կողմից միջոցառմանը մասնակցում են ՀՀ ԷԲՊՆ նախարարության, «Հայռուսգազարդ» ՓԲԸ, այլ ընկերությունների ներկայացուցիչներ, ռուսական կողմից` ՌԴ էներգետիկայի նախարարության, «Գազպրոմ» ԲԲԸ, «Ինտեր ՌԱՕ ԵԷՍ» ԲԲԸ, «ՌուսՀիդրո» ԲԲԸ և այլ ընկերությունների ներկայացուցիչներ: Կլոր սեղանի շրջանակներում կքննարկվեն էներգետիկայի բնագավառի (ատոմային էներգետիկա, նավթ և գազ, հիդրոէներգետիկա և այլն) գործնական երկկողմ հարաբերությունները, ինչպես նաև առկա խնդիրներն ու դրանց զարգացման հեռանկարները, հաղորդում է ՀՀ էներգետիկայի և բնական պաշարների նախարարության մամլո ծառայությունը: