Պետդումայի վավերացմանն է ներկայացվել ՀՀ-ում ՌԴ ռազմակայանի տեղակայման երկարացման մասին արձանագրությունը

PanARMENIAN.Net - Ռուսաստանի նախագահ Դմիտրի Մեդվեդևը Պետդումայի վավերացմանն է ներկայացրել ՀՀ-ում ՌԴ ռազմակայանի տեղակայման երկարացման մասին արձանագրությունը, որը ստորագրվել է Երևանում 2010թ. օգոստոսի 20-ին, հայտնում է Կրեմլի մամլո ծառայությունը:

Արձանագրության համաձայն երակարցվում է երկու երկրների միջև կնքված Հայաստանի տարածքում ռուսական ռազմակայանի տեղակայման ժամկետը մինչև 49 տարի երկարացման մասին: Արձանագրությամբ նախատեսվում է, որ ռուսական ռազմակայանը ՌԴ շահերի պաշտպանությունից բացի ՀՀ Զինված ւոժերի հետ համատեղ պետք է ապահովի նաև Հայաստանի անվտանգությունը: 102-րդ ռուսական ռազմակայանը տեղակայված է Գյումրիում և մարտական հերթապահություն է իրականացնում ԱՊՀ ՀՕՊ Միացյալ համակարգի շրջանակներում: Ռազմակայանը ենթարկվում է ՌԴ Հյուսիս-կովկասյան ռազմական տարածաշրջանի Անդկովկասի ռուսական զորքերի խմբին:

Ռազմակայանը հագեցած է C-300 զենիթահրթիռային համալիրներով և ՄիԳ-29 կործանիչներով: Անձնակազմը հասնում է 5 հազարի:

Ըստ կատարված փոփոխությունների պայմանագրի գործողության ժամկետը կերկարաձգվի ամեն 5 տարին մեկ, եթե կողմերից ոչ մեկը հերթական ժամկետի լրանալուց վեց ամիս առաջ գրավոր կերպով չիրազեկի հակառակ կողմին նրա գործողությունը կասեցնելու մտադրության մասին: Քանի որ ռուսական ռազմակայանը ՌԴ շահերի պաշտպանությունից բացի, հայկական ԶՈՒ-հետ համատեղ իրականացնում է նաև Հայաստանի անվտանգության պաշտպանությունը, ռուսական կողմը, ըստ փաստաթղթի, պարտավորվում է մատակարարել հայկական բանակը ժամանակակից սպառազինությամբ ու ռազմական (հատուկ) տեխնիկայով:

Բացի այդ, ռուսական ռազմակայանի զինվորական ստորաբաժանումները կգործեն կողմերի փոխադարձ պայմանավորվածությունների հիման վրա, հաղորդում է «ՌԻԱ Նովոստի» գործակալությունը: