Արցախում անկախության 20-ամյակի կապակցությամբ համաներում է հայտարարվել

30 օգոստոսի 2011 - 19:28 AMT

PanARMENIAN.Net - Օգոստոսի 30-ին Լեռնային Ղարաբաղի Հանրապետության Ազգային ժողովն իր արտահերթ նստաշրջանում հավանություն է տվել ԼՂՀ նախագահի նախաձեռնությամբ և նրա առաջարկած «ԼՂՀ հռչակման 20-րդ տարեդարձի կապակցությամբ համաներում հայտարարելու մասին» ԼՂՀ ԱԺ որոշման նախագծին: ԱԺ նախագահ Աշոտ Ղուլյանը հայտնեց, որ անցած քսան տարում ԼՂՀ-ում սա 6-րդ համաներումն է, ընդ որում` բոլոր համաներումները մեծամասամբ համընկել են երկրի պետական-քաղաքական կարևոր իրադարձությունների հետ` «յուրաքանչյուր անգամ բխելով պետության, իշխանությունների մարդասիրական դերակատարությունից և առաքելությունից»: Համաներման նախագծի վերաբերյալ քվեարկությունից հետո ԱԺ նախագահը խորհրդարանի պատգամավորական կազմի և աշխատակազմի անունից շնորհավորանքներ հղեց երկրի ժողովրդին, աշխարհի հայությանը, Արցախի՝ տարբեր երկրներում բնակվող բոլոր բարեկամներին ԼՂՀ հռչակման 20-րդ տարեդարձի առթիվ։

Համաներմամբ ազատ կարձակվի ազատազրկման մեջ գտնվող անձանց շուրջ 25 տոկոսը, և պատժից կազատվեն ազատազրկման հետ չկապված պատիժների դատապարտված բոլոր անձինք, իսկ կարճման ենթակա որոշակի քրեական կամ դատական գործերի ընդհանուր թիվը տատանվում է առկա գործերի 60-80 տոկոսի միջև։

Արցախի Հանրապետություն

1923թ., հաշվի չառնելով Լեռնային Ղարաբաղի բնակչության կարծիքը, ՌԿԿ(բ) Կովկասի բյուրոյի որոշմամբ Ադրբեջանական ԽՍՀ կազմում ստեղծվեց Լեռնային Ղարաբաղի ինքնավար մարզ:

65 տարի անց, Լեռնային Ղարաբաղում ժողովրդական շարժում սկսվեց Հայաստանի հետ վերամիավորվելու նպատակով, ինչը հավանության չարժանացավ ԽՍՀՄ իշխանությունների կողմից: 1991թ. սեպտեմբերի 2-ին ԼՂԻՄ եւ Շահումյանի շրջանի Ժողովրդական պատգամավորների խորհրդի համատեղ նիստում ԽՍՀՄ կազմում հռչակվեց Լեռնային Ղարաբաղի Հանրապետությունը ԼՂԻՄ-ի եւ Շահումյանի շրջանի սահմաններում, որոնց բնակչությունը հիմնականում հայեր էին: 1991թ. դեկտեմբերի 10-ին անցկացվեց ԼՂՀ անկախության հանրաքվեն: 1991թ. դեկտեմբերի 28-ին անցկացվեցին խորհրդարանական ընտրություններ, որոնց արդյունքում կազմավորվեց առաջին կառավարությունը:

1991 թվականի աշնանն Ադրբեջանում սկսվեցին ռազմական գործողություններ, որոնց ընթացքում նրան հաջողվեց վերահսկողություն սահմանել Շահումյանի շրջանում եւ բռնազավթել ԼՂՀ Մարդակերտի, Հադրութի եւ Մարտունու շրջանների մեծ մասը: 1993թ. կեսից պատասխան ռազմական գործողությունների արդյունքում, ԼՂՀ-ն վերականգնեց վերահսկողությունը գրեթե իր ողջ տարածքում: 1994թ. հրադադարի մասին համաձայնագրի ստորագրումից հետո ԼՂՀ վերահսկողության տակ են շարունակում մնալ նաեւ Քելբաջարի, Լաչինի, Կուբաթլիի, Ջեբրաիլի, Զանգելանի շրջաններն եւ Աղդամի ու Ֆիզուլիի շրջանների մի մասը (անվտանգության գոտի): Հետագայում, ԼՂՀ Սահմանադրության 142 հոդվածում նշված է, որ մինչ Լեռնային Ղարաբաղի Հանրապետության պետական տարածքի ամբոջականության վերականգնումը եւ սահմանների հստակեցումը, հանրային իշխանությունն իրականացվում է այն տարածքում, որը փաստացի գտնվում է Արցախի Հանրապետության իրավասության տակ: