Շևկետ Շայդուլլին. 2011թ. ՀԿԵ համար կլինի երկաթուղու առանց կորուստների աշխատանքի տարի

2 սեպտեմբերի 2011 - 10:59 AMT

PanARMENIAN.Net - «Հարավկովկասյան երկաթուղի» ընկերության գլխավոր տնօրեն Շևկետ Շայդուլլինի հրամանով ստեղծվել է Երևանի վագոնալոկոմոտիվային դեպո: Նոր կառույցը ստեղծված է Երևանի լոկոմոտիվային և Երևանի վագոնանորոգման դեպոների միավորման միջոցով՝ ՀԿԵ-ի կառուցվածքի արդիականացման, ճանապարհը սարքին շարժակազմով ապահովելու, գնացքների անվտանգ երթևեկության ապահովելու նպատակով:

Այժմ մշակվում է նոր դեպոյի արտադրական գործունեության տեխնոլոգիան, վերակազմավորված կառույցներից աշխատանքի են ընդունվում համապատասխան մասնագետներ: Վերակազմավորված կառույցների աշխատանքից ազատված մասնագետները աշխատանքի կանցնեն նաև ՀԿԵ-ի այլ ստորաբաժանումներ:

Ինչպես նշում է ընկերության գլխավոր տնօրեն Շևկետ Շայդուլլինը, ՀԿԵ-ն տպավորիչ հաջողությունների է հասնում ենթակառուցվածքի և շարժակազմի արդիականացման, գնացքների անվտանգության ապահովման շնորհիվ:

«2011-ը մեզ համար լինելու է երկաթուղու առանց կորուստների աշխատանքի տարի: Դա մեր թիվ մեկ խնդիրն է, - ասաց Շ.Շայդուլլինը. – Այս նպատակին հասնելու համար մենք այսօր լուծում ենք մի շարք խնդիրներ՝ այդ թվում միջազգային ստանդարտներին ենք համապատասխանեցնում մեր ենթակառուցվածքը և շարժակազմը»: