Նախարար. ՏԿՆ-ը ստորերկրյա խորքային հորերի հորատման հարցերով չի զբաղվում

PanARMENIAN.Net - Մարզպետները քննարկել են տեղական ինքնակառավարման համակարգի ներդրման 15-ամյակի հոբելյանական միջոցառումների շրջանակում հոկտեմբերի 10-11-ը Ջերմուկում անցկացվելիք գյուղական համայնքների ֆորումի կազմակերպչական հարցեր: Տարածքային կառավարման նախարարությունից հայտնում են, որ փոխվարչապետ Արմեն Գևորգյանը կարևորել է թե' մարզպետարանների, թե' ՏԻ մարմինների ներկայացուցիչների ակտիվ մասնակցությունն առաջին անգամ հանրապետությունում այս ձևաչափով անցկացվող միջոցառմանը, որի ընթացքում քննարկվելու են համայնքային զարգացման ամենահրատապ թեմաները:

Խորհրդակցությանն անդրադարձ է եղել նաև Արարատյան դաշտավայրի ստորերկրյա խորքային հորերի հորատման թույլտվությունների խնդրին, որի վերաբերյալ վերջին շրջանում քաղաքացիների, տարբեր կազմակերպությունների և լրատվամիջոցների կողմից հարցադրումներ են լինում: Գևորգյանը տեղեկացրել է, որ տարածքային կառավարման նախարարությունն այդ հարցերով չի զբաղվում: 2010թ. ՀՀ վարչապետի որոշմամբ Արարատյան դաշտավայրի ստորերկրյա խորքային (այդ թվում` ինքնաշատրվանող) հորերի արդյունավետ օգտագործման նկատմամբ վերահսկողություն սահմանելու նպատակով ստեղծված միջգերատեսչական աշխատանքային խումբը, որը ղեկավարում էր փոխվարչապետը, այս տարի մայիսին ՀՀ վարչապետի որոշմամբ լուծարվել է, և նոր հորերի հորատման թույլտվությունների տրամադրումը եղել և մնում է պետական լիազոր մարմնի` բնապահպանության նախարարության իրավասության ներքո: