«Բանակն իրականում». Ալիկ Սարգսյանի և ոստիկանների գործողություններում առկա են հիմքեր քրեական գործի հարուցման համար

PanARMENIAN.Net - «Բանակն իրականում» հասարակական նախաձեռնության անդամները հաղորդագրություն են տարածել հանցագործության մասին։ «Բանակն իրականում» հասարակական նախաձեռնության անդամները ՀՀ կառավարության շենքի առջև այսօր կազմակերպել էին ցուցապաստառներով պիկետ: Նշվում է, որ բողոքի գործողությունը սկսվել էր նախատեսված ժամին և ընթանում էր խաղաղ մինչև այն պահը, երբ ՀՀ ոստիկանապետ Ալիկ Սարգսյանը, իր շրջապատող անձանց հետ դուրս գալով ՀՀ կառավարության շենքի մուտքից, շարժվել է դեպի ցուցարարները և հրելով նրանց` խոչընդոտել է բողոքի խաղաղ գործողությունը:

«Մասնավորապես, Ալիկ Սարգսյանը ոտնձգություն է իրականացրել բողոքի մասնակից Լալա Ասլիկյանի նկատմամբ` հրելով նրան և վնասել ցուցապաստառը: ՀՀ ոստիկանապետ Ալիկ Սարգսյանը, դրսևորելով նման վարքագիծ, փաստացի սկսել է իրագործել ՀՀ պաշտպանության նախարարի տեղակալ Վլադիմիր Գասպարյանի կողմից «Հ1» հեռուստատեսության «Հայլուր» հաղորդմամբ օրերս հայտարարած սպառնալիքի իրականացումը»,- նշվում է հայտարարության մեջ:

Ալիկ Սարգսյանի կողմից կատարված բռնարարքի` սահմանադրական իրավունքի ոտնահարման փաստի ականատեսը լինելով ցուցարարները հնչեցրել են տարբեր գնահատականներ: Ալիկ Սարգսյանը իր հասցեին հնչեցրած կարծիքներին պատասխանել է հանձնարարականով` ցուցարար Վարդգես Գասպարիին առանձնացնել և տանել ոստիկանություն։ Հանձնարարականը ոստիկանները կատարել են բռնի ուժի գործադրմամբ և օրենքի խախտումով. «Հիմք ընդունելով վերոգրյալը` գտնում ենք, որ ՀՀ ոստիկանապետ Ալիկ Սարգսյանի և բռնարարքներին մասնակցող ոստիկանների գործողություններում առկա են ՀՀ քրեական օրենսգրքով նախատեսված մի շարք արարքներ, որոնք հիմք են քրեական գործի հարուցման համար»: