ՆԱՏՕ գլխավոր քարտուղարը ցավակցություն է հայտնել թուրքական իշխանություններին

PanARMENIAN.Net - ՆԱՏՕ գլխավոր քարտուղար Անդերս Ֆոգ Ռասմուսենը ցավակցություն է հայտնել թուրքական իշխանություններին Վանում հոկտեմբերի 23-ին տեղի ունեցած ավերիչ երկրաշարժի հետ կապված։ «Ես վշտացած եմ տեղի ունեցածից, որի արդյունքում շատ մարդիկ են մահացել և մեծ վնաս է հասցվել»,- ասվում է Ռասմուսենի ուղերձում։

Գլխավոր քարտուղարը պատրաստակամություն է հայտնել անհրաժեշտության դեպքում օգնել թուրքական իշխանություններին։ Հոկտեմբերի 23-ին ժամը 15.41-ին գրանցվել է 7.1 մագնիտուդով երկրաշարժ, որի էպիկենտրոնը գտնվում էր Թուրքիայում՝ Վան քաղաքից 38 կմ դեպի հյուսիս:

Երկրաշարժի հիպոկենտրոնը գտնվում է 10 կմ խորության վրա, իսկ ուժգնությունն էպիկենտրոնային գոտում կազմել է 9-10 բալ: «Ալ Արաբիա» հեռուստաալիքը հայտնել է, որ զոհվել է 500-1000 մարդ:

Երկրաշարժը զգացվել է 3-5 բալ ուժգնությամբ ՀՀ տարածքում:

Ինչպես հաղորդվել է ավելի վաղ, Թուրքիային իրենց աջակցությունն են առաջարկել նաև Ադրբեջանը, ԱՄՆ-ն, Մեծ Բրիտանիան, Գերմանիան, Լեհաստանը, Հունգարիան, Շվեյցարիան, Հայաստանն ու Հունաստանը, ինչպես նաև Իսրայելը, որի հետ հարաբերությունները վատթարացել են 2010թ. «Ազատության տորմիղի» հետ կապված միջադեպից հետո: